Shillong, Risaw 24: U Secretary ka North Eastern Council (NEC), u Satinder Kumar Bhalla, u la leit biang sha West Jaintia Hills distrik ha ka 23/Risaw/2026 na ka bynta ban khmih biang iaka jingtreikam jong ka projek ba hap hapoh ka USP, ka Integrated Lakadong Turmeric Value Chain Enhancement Project.
La synran lang ia une u Secretary da u Dr. Sentitula, IFS, Director (Tourism & Industries), NEC; u Pranjal J. Dutta, Joint Managing Director, Meghalaya State Agricultural Marketing Board, Government of Meghalaya bad ki heh nongtrei jong ki ophis jong ka District Horticulture Officer, District Agriculture Officer bad Meghalaya Basin Management Agency (MBMA).
Ha katei ka jingleit, u Secretary u la leit jurip iaka jaka ha ka shnong Thadmuthlong C. Phramer na ka bynta ban peit iaka jingtei jong ka Centralised Processing Unit. Katba ka kynhun ba wanrah ia kane kala pyni iaka dur jong ka Curcumin Extraction Plant bad kila pynshai shaphang ka jingtreikam jong ka jingpynkhreh ia kane. Ka kynhun kala dep pyntip ba ki engineer ka civil bad ki pulit ka teknikal ba ki dang treikam ia kane bad ka jinglut jingsep, kaba bud da ka kiwei kiwei ki jingtreikam.
U Secretary u la ioh iakren ruh bad ki dkhot jong ka Lakadong Turmeric Cooperative Union Ltd., uba dei u trai jong ka shonshap Geographical Indication (GI) Lakadong Turmeric. Katba ka Union kala iaroh ia u halor ka jingiatreilang bad ka tnad ka rep ka riang bad ka bha ka miat ki nongrep ha kaban buh ia kane ka projek.
Ki dkhot ruh hangne kila dep sam ia la ki jong ki jingshem ha ka jingleit jong ki sha Kandhamal, Bengaluru bad Hyderabad, kiba la shimti ban ioh iaki jingshai kiba shisha halor ki rukom pynmih shynrai, ki kor pynmih umphniang, ki rukom thung kynbat khlem khyndew bad ki lad ban pyniasoh bad ki iew ki hat.
Ka Union kala pynpaw iaka jingshaniah ban pynpaw pyrthei ba ka Curcumin Extraction Unit kan lah ban pynskhem iaka dor ba kham bha kaba wan na ka thain ban sumar bad pynbha shuh shuh iaki jait mar, kan iarap iaki nongthung ban ioh iaka dor kaba kham bha na ka bynta u shynrai Lakadong bad kan pynjanai iaki lad kamai jakpoh na ka bynta ki nongrep ha baroh kawei ka thain Jaintia.
U Secretary u la leit kynduh iaka kynhun ba pyntreikam ia u shynrai Lakadong, ka Shangpung Farmers Union Collective Marketing Centre (CMC) ha Shangpung Pohshnong. Haba u iakren bad ki dkhot ka CMC bad ki nongrep na ki shnong ba marjan, ki nongrep kila pynpaw iaki jingeh kiba iadei bad ka rep shynrai, khamtam ka jingduna eit masi, bad kila kwah iaka jingiarap ban ioh masi khnang ban pynbiang ia kane ka jingdonkam.
U Satinder Kumar u la pynshai ba kum kine ki projek ki hap shabar jong ka jingpeit ka NEC bad ong ba ki nongrep kin ioh ka jingkyrshan lyngba ka National Dairy Development Board (NDDB), katkum ki kyndon bad ki jingpynbit jong ka skim kaba dei bad kaba iadei.
Kum shi bynta jong katei ka jingleit jurip, u Secretary u la khmih bha iaka rukom treikam ka Bio-curcumin Extraction Unit ba ka pyntrei da ka LIFE Spice Processing Cooperative Society Ltd. ha ka shnong Laskein. Ka unit shen kan sa sdang iaka kam sei dawai curcumin, namar ba dang ap iaka jingpynsbun ne ka jingmynjur na ka ISO.
Katei ka jingleit jurip ka pynioh iaka lad ban peit iaka jingpyn treikam kane ka projek ha katei ka jaka, ban iajan bad ki kynhun nongrep bad ban pynshongdor ia kiba donkam ban pyni ha ka jingtei iaki kor ki bor pynkylla, ka jinglong ka mar, ka kabu pyniaid iew bad ka jingpynbha shuh shuh ia u shynrai Lakadong ha Meghalaya.
