Shillong, Risaw 26: Ka District Election Office, East Khasi Hills, ha ka sngi nyngkong kala dep pyllait iaka Final Electoral Roll kaba bud da ka Special Intensive Revision (SIR) 2026 ha ka Golden Jubilee Mini Auditorium jong ka North-Eastern Hill University (NEHU), Shillong.
Katba iaki kot ki sla bad ki kopi ba la don ha ka kompiwtar ba dei jong ka electoral roll ba khatduh, la dep aiti noh sha ki nongmihkhmat jong ki seng sain pyrthei ba na kane ka jylla bad shabar ri, kumjuh ruh sha ki Dorbar Shnong.
Ha katei ka prokram, u bah Ronnieson Wahlang, MCS, Additional Deputy Commissioner uba don ha ka Election Branch, u la ai jingiaroh iaka jingtrei shitom jong ki bor ba dei peit ka distrik, ki heh nongtrei ka elekshon, ki seng sain pyrthei bad ki kynhun synshar tynrai kum ki dorbar shnong, ki dorbar kur, bad ki synjuk rangbah shnong ki don ka bynta bakhraw bha bad ba hakhlieh tam eh ban pynbiang bad ban pyniaid ryntih iaki kam pynkhreh ne pynbeit biang iaki kot ki sla lane hapoh ka imlang sahlang.
U la ong ba ka jingpynmih iaka electoral roll na ka bynta baroh ki thain konstitwensi hapoh East Khasi Hills distrik bad ar tylli ki konstitwensi hapoh Sohra Civil Sub-Division ka pynia tylli lang iaka jingiatreilang bad ka jingia snohkti lang hapdeng kiba nyngkong baroh kiba don bynta ha kane ka rukom treikam.
U bah Wahlang u la pynpaw ka jingiaroh na ka bynta ka kam ba kongsan kaba la leh da ki Dorbar Shnong, da kaba ong ba ka jingkyrshan jong ki kala iarap iaki bor ba dei peit ka elekshon ba kin lah ban kynduh iaki paidbah nongshong shnong bad ym don ba la shah iehnoh shadien ha kane ka electoral roll. U la ban jur iaka jingdonkam ba kongsan jong kine ki kynhun synshar tynrai bad kila lah ban pynskhem iaka jingiatreilang hapdeng ka imlang ka sahlang bad ki bor ba dei peit.
U la ai jingiaroh ruh kumjuh iaki Booth Level Officers (BLO) bad ki nongpyniaid kam jong ki na ka bynta ka jinglah jong ki ban leit ha man ki iing briew bad ha kiwei kiwei ki jaka, da kaba batai ba ki long ki riewkhraw jong ka jingtreikam ka SIR. Da kaba pynkynmaw iaki jingeh kiba ki shem ha ka por ba don kane ka jingtreikam, u la ong ba ki BLO kila shem jingeh ha kaban iatreilang bad ka jingbym treh ki nongshong shnong ban kynduh iaki.
U la ai jingiaroh iaka jinglah jong ki Electoral Registration Officers (ERO), ki Assistant Electoral Registration Officers (AERO), kiba la shimkhia iaka kam ba ki trei wat hapdeng jong ka kam ba ki trei ha ophis. U la ong ba ka jingpyntreikam iaka jingsngap bad jingpyn ithuh ka donkam bha, ryngkat ki heh nongtrei kiba la trei tam iaka por treikam ha ophis khnang ban peit iaki nongthep vote kin shah kynthup ha ka jingleit thep vote.
U la ai jingiaroh ruh kumjuh iaki nongtrei jong ka Deputy Commissioner’s Office, kiba la pyndep iaka kamram jong ki ha kane ka jingtreikam. Katba ki nongmihkhmat jong ki seng sain pyrthei ba na ka jylla bad nabar ri kila ai jingiaroh iaka District Election Office bad ki bor pyniaid jong ka distrik na ka bynta ka jingtrei shitom jong ki ha kaban pynlong iaka SIR watla ki shem jingeh ha ka por treikam.
Ki rangbah shnong, kila pynpaw iaka jingsngew nguh jong ki sha ki heh nongtrei jong ka elekshon bad kular iaka kynhun treikam ka bor distrik ba kin bteng ka jingiatreilang bad jingkyrshan jong ki ha ki por ban wan jong ka jingpyntreikam iaka jingpynrung kyrteng iaki nongthep vote.
