Shillong, Risaw 26: U President ka Meghalaya Pradesh Congress Committee u bah Vincent H. Pala u la ong ba ha ka jingialang ka party kaba la long mynta ka sngi 26/Risaw/2026 ha ka jingiadon lang ki Distrik President kila pdiang sngewbha ia ka jingwan ai jingkyrshan u MP barim ka Rajya Sabha u Dr. W.R. Kharlukhi.
U bah Vincent u la ong u Dr. Kharlukhi u la don hynriew snem ha Delhi u la iohi ia ka jingma kaba ka BJP ka pyrshang ban leh ia ki khristan dei na kane ka daw u la wan ban kyrshan ia ka party Congress bad kum ka party ka pdiang sngewbha ia kane ka jingkyrshan.
U Dr. W.R. Kharlukhi u la ong ba ka don shibun ki jingiatharai hangne bad hangtai hadien ba u la hiar shuki noh kum u State President jong ka National People’s Party bad ha jingkylli kaba kiba bun kila kylli kaei pat phin leh hadien kane.
Ha kane ka sngi u la pynbna ba u la rai ban kyrshan ia ka party Congress bad ia u bah Vincent H. Pala ha kane ka election shiteng samoi na ka 1-Shillong ST Constituency, ka daw ka long ba ka jingwanrah ia ka jingpynkylla ia ka ain Foreign Contribution Regulation Amendment Bill bad u la ong ba u pyrshah jur ia kane kumba ka long mynta.
U la ong ba ha ki 79 snem jong ka jinglaitluid ka Ri India mynta u sngewthuh ba ka don ka jingma kane ka Bill namar ka kyndon kaba 16A jong kane ka Bill ka long kaei kaei ka bym sngewtynnad bad kaba pynthut bad ka bym lah ban pdiang bad lada ym dei na ka Congress ban pyrshah ia kane ka Bill ha ka jingshong dorbar Parliament kaba la dep bad kane ka bill kan jin da la long ain.
U la ong kaei ka ban jia ia ki khristan kiba dei ki rit paid bad kawei pat ka long shai ba ka Congress ka ieng skhem ban pyrshah ia ka FCRA bad na ka liang ka Congress ka dawa ba ia kane ka Bill dei ban weng shi syndon dei halor kane ka nongrim ba u la rai ban kyrshan ia ka party Congress bad ia u kyrtong ka Congress u Vincent H. Pala bad u la ong ba ngi donkam ban iada bad ban pynkhlain ia ka Congress.
