Shillong Risaw 31: Ka National Institute of technology Meghalaya (NIT Meghalaya) kan pyllong ia ka Convocation ha ka 4/Risaw/2026 ha phyllaw jong ka jaka pule ha Sohra, Meghalaya.
Haba kren sha ki lad pathai khubor u Director ka NIT u Prof. Pinakeswar Mahanta ula iathuh ba kin don 321 ngut ki khynnah kiban shah pynkup burom ha ka Degree, napdeng kine kin don 158 ngut ki samla pule ha ka B.Tech, 56 ngut ha ka M.Sc. bad 55 ngut ha ka Ph.D.
Ha kane ka sngi ban pynkup burom ia ki samla pule, u Dr. Anand Deshpande u Nongseng uba dei ruh u Chairman ka bad Managing Director jong ka Persistent System Ltd, un long u kongsan. Katba u Prof. Devendra Jalihal, Director ka IIT Guwahati un long kum u Symbud Kongsan ha katei ka sngi.
Ha katei ka sngi ka NIT kan sam ruh15 tylli ki Academic Medal kaban kynthup 7 tylli ki takma ksiar bad 8 tylli ki takma rupa, kum shi bynta ban ithuh ia ka jingtrei shitom ha ka pule puthi.
U Director ula iathuh ba kane ka shlem pule ka don ha ka kyrdan kaba 83 ha ka thup jong ka NIRF Engineering Ranking ha u snem 2025. Ha une u snem ba la dep, ka NIT Meghalaya ka la kiew bha ha ka jingpule, ka jingwad bniah, ka jingpynroi ia ki jingtei bad ka jingbha jingmiat jong ki samla pule.
Ula ong ba kane ka shlem pule ka la paw ha ka kyrdan jong ka skulbah Asia 2026 (791- 800 band) bad ka kyrdan jong ka skulbah jong ka pyrthei 2027 (1201-1400 band), bad ka la ioh ia ki katto katne ki jingpynkup burom ba kongsan kynthup ia ka kyrdan FCIll Higher Education Excellence Award 2026.
Shuh shuh ula ong ba ha ka shisnem ba la dep, ka skulbah ka la don palat 450 tylli ki kot SCI/Scopus, 17 tylli ki projek wadbniah ba la kyrshan kiba shongdor T.5.36 klur bad 38 tylli ki projek ai jingmut kiba shongdor T.2.04 klur.
Katkum ka jingong u Director ka jingpynrung kam ha ki jaka pule ki la sakhi ia ka jingiashim bynta na ki 230 tylli ki kompeni, ha kaba la buh 75.69% na bynta ki samla pule kiba dei hok.
Ula ong ba kane ka shlem pule ka la bteng ban pyntreikam ia ka NEP 2020 lyngba ki jingpynkylla ia ki rukom hikai, ki prokram M.Tech ba iadei bad ki jait jingpule bapher bapher bad ba iatreilang bad ki lIT bad kiwei kiwei ki jaka pule ba pawnam, ki jingthmu pule digital bad ki prokram ba thymmai.
Kine ki jingjop ki pyni ia ka jingangnud jong ka NIT Meghalaya ban long ka jaka pdeng jong ka jinghikai ba tbit ha ka liang ka jingstad, ka jingwad bniah ha ka thain shatei lammihngi bad ka ri,” ong u Director ka NIT.
