Shillong, Naiwieng 01: Ka Academic Assembly 2026 ha College of Post Graduate Studies in Agricultural Sciences (CPGSAS), Central Agricultural University Imphal, Umiam, Meghalaya, kala pynlong ia ka jingialang ha ka 31 tarik u Risaw 2026, halor ka phang “Pynkylla ïa ki kam hikai hapoh ki klas lyngba ka NEP 2020: Ka jingïateh lang ïa ka jingstad tynrai, ka kolshor bad ka Jingpule kat kum ka jingshem.”
Ka bynta ba kongsan tam jong kane ka jingïalang ka long ka jingpynkup burom ïa ki hynriew ngut ki nongrep bad ki briew kiba sengkam ha ka liang ka rep ka riang, da ka khusnam kaba don burom ka‘Krishi Gaurav Samman 2026’, kaba ithuh ïa ka jingnoh synniang jong ki ha ka roi ka par jong ka kam rep kam riang, ka jingïada bad pynneh pynsah ïa ki jait jingthung tynrai, ka rukom rep kaba neh bad ki jingseng kam seng jam ha ki shnong nongkyndong.
Kaba kham kongsan ka long ba arngut na ki nongïoh khusnam ki la shah pynkup burom kham mynshwa da u Myntri Rangbahduh ka ri, u Shri Narendra Modi, ha ka bynta ba 139 jong ka Mann Ki Baat na ka bynta ki jingnoh synñiang jong ki ban pynim bad ban kyntiew biang ïa ka rukom rep tynrai ia u Krai ha Meghalaya.
Ia kane ka Academic Assembly lah pyniaid lang da ka Purvottar Janajati Shiksha Samiti (PJSS) bad CPGSAS, CAU (Imphal), ryngkat ka jingkyrshan jong ka ICAR Research Complex for NEH Region, Umiam, North Eastern Development Finance Corporation Ltd. (NEDFi) bad ka Meghalaya Shiksha Samiti, hapoh ka jingïalam jong u Dr. Anupam Mishra, Vice-Chancellor jong ka CAU (Imphal), bad la pynïaid ïa ka jingïalang da u Prof. Dwipendra Thakuria, Director of Instruction, CAU (Imphal), uba long ruh u nongpyniaid jong ka CPGSAS, Umiam.
Ha ka jingïalang pynwai la iadon lang da u Dr. Anupam Mishra, Vice-Chancellor jong ka CAU (Imphal), kum u Kongsan, katba u Prof. Debabrata Das, President jong ka PJSS bad Vice-Chancellor jong ka Tripura University, u la pynïaid ïa ka jingïalang.
U Prof. Ganga Prasad Parsain, President jong ka Vidya Bharati Purvottar Kshetra, u la wan kum u Symbud Kongsan, ryngkat bad ka Dr. Babli Chaudhury, All India Joint Secretary jong ka Vidya Bharati, bad kiwei pat ki nongïalam bad ki riewpawkhmat.
La ai ïa ka khusnam Krishi Gaurav Samman 2026 ha ki hynriew ngut, kum ka jingithuh ïa ka jingnoh synniang kaba khraw jong ki ha ka kam rep, ka jingpynlong ïa ka rep ka riang kum ka kam khaii bad ka jing kyntiew ïa ka pateng jong ka rukom rep tynrai.
Ki nong iohpdiang ia ka khusnam ki kynthup ïa u Chekjing Sangma na ka shnong Sadolpara, West Garo Hills District, uba la sdang ban pyntreikam bad kyntiew ïa ka rukom rep ia u Krai; Ka kong Darapbiang Mulieh na ka shnong Khanduli, West Jaintia Hills District, kaba kyntiew ïa ka jingpynmih ïa kiwei pat ki jait jingbamkiba na u krai; Ka kong Sitrian Surong na ka shnong Khanduli, kaba trei shitom ban pynneh pynsah ïa ka rukomtynrai jong u krai ha Meghalaya.
Ka kong Trinity Saioo, kaba la paw kum ka Lakadong Lady of Meghalaya, na ka shnong Mulieh, West Jaintia Hills District, kaba trei shitom ban kyntiew ïa ka rukom rep bad pynmih ïa u shynraiLakadong; Ka kong Jemnud Marpan na ka shnong Thadnongniaw, Ri-Bhoi District, kaba pynneh pynsah bad kaba pynmih bun jait ki jait jingthung tynrai.
U Midat M. Binau, Professor of Practice, Manipur University, Marngar, Ri-Bhoi District, uba la pyni ïa ki sienjam kiba ai mynsiem ha ka kam rep kam riang, da kaba pynkylla ïa ki rukom thung tynrai sha ki lad kamai ha ki ïew ki hat kiba ha ka pyrthei baroh kawei.
Kane ka jingithuh ka pyni ïa ka bynta kaba kongsan jong ki nongrep, khamtam eh ki nongrep kiba dei ki kynthei bad ki nongseng kam ha ki shnong nongkyndong, ha ka ban pynneh pynsah ïa ka jingtip tynrai shaphang ka rep ka riang, ban kyntiew ïa ki jait jingthung tynrai, pynkhlaiñ ïa ki jingïadei ha ka jingpynmih bad jingshalan ïa ki mar ha ki ïew ki hatkiba hapoh ka thaiñ bad ban thaw ïa ki lad kamai jakpoh ha kylleng ka thaiñ Shatei Lammihngi jong ka ri.
Haba ai jingkren ha kane ka jingïalang, u Dr. Anupam Mishra u la ban jur ïa ka jingdonkam ban pynïasoh lang ïa ka jingtip tynrai bad ki buit ki bor stad saian kiba mynta na ka bynta ban kyntiew ia ka rep ka riang ka ba neh. U la kdew ïa ka jingstad kiba tynrai jong ki jaitbynriew riewlum ha ka ban pynneh pynsah ïa ki jingthaw ki ba im, ka jingsumar ïa ki khlaw bad ka jingïada ïa ki mar poh khyndew.
U la ban jur ruh ïa ka jingdonkam ban lum bad buh jingthoh ïa ki jingtip shaphang ki jingmyntoi ha ka rukom saian, bad ban ithuh ïa ka dor jong ki ha ka liang ka ïoh ka kot, ryngkat bad ka jingkyntiew ïa ka jingsdang jong ka jingpyntreikam, ka jingpynkiew ïa ka dor bad ki kam khaii kiba pynïaid da ki shnong, khnang ban pynkhlaiñ ïa ka lad kamai jakpoh jong ki jaitbynriew riewlum.
Ha kane ka Academic Assembly la pynlong ruh ar tylli ki jingïakren, kata ka jingïakren bad ki nongrep bad kajingïakren halor ka NEP 2020, kiba la ai lad ïa ki nongrep, ki riewstad pule puthi, ki nonghikai bad kiwei pat ki nong don bynta, ban ïakren bad ïasam ïa jingïoh jingtip jong ki.
Ha kane ka jingïalang la sakhi ia ka jing don jong ki 375 ngut ki nongisshim bynta kiba la dep pynrung kyrteng, kiba mihkhmat ïa ki kynhun bad ki seng bapher bapher na kylleng ka thaiñ
Kham hashwa, ha ka jingïalang plie paidbah, la iadon lang da u Dr. B. D. R. Tiwari, IAS, Chief Election Commissioner jong ka Meghalaya, kum u Kongsan, katba u Prof. Debabrata Das u la pynïaid ïa ka jingïalang.
Ha ka jingkren plie, la ban jur ïa ka jingdonkam ban pynneh pynsah ïa ka jingtip tynrai, ka jingïapher jong ki kolshor, ka jingbun jait jong ki jingthaw baim bad ki jinglong tynrai, ha kajuh ka por ban ioh ïa ka roi ka par kaba kynthup lang ïa baroh bad kaba lah ban bteng ha ka lawei.
Ka jingpynkup burom ïa ki hynriew ngut kiba la ïohpdiang ïa ka khusnam ka la pynskhem biang ïa ka jingkular jong ka CAU (Imphal) bad CPGSAS, Umiam, ha ka ban ithuh ïa ki nongrep kum ki nongwanrah ïa ki jingmut thymmai, ki nongpynneh pynsah ïa ka jingtip tynrai bad ki nongnoh synniang ba kongsan ha ka jingpynkylla ïa ka kam rep kamriang.
Kane ka sienjam ka la rakhe ïa ka jing riewspah jong ka Meghalaya ha ka liang ka rep ka riang bad ka la pyni ïa ka jingdonkam jong ki jingmut thymmai kiba wan na ki nongrep ha ka ban tei ïa ka lawei jong ka ka rep ka riang kaba neh bad kaba lah ban shaniah ha lade.
