Shillong, Lber 19: Ka seng lehnoh GNLA mynta ka sngi kala pynlait paidbah ia ka shithi jong ka ba ka la thung ia u ksiang jong ka ban ia kren bad ka sorkar na ka bynta jong ka seng bad u ta u dei u muktiar Sujit Dey.
Ha kane ka shithi na ka liang jong ka seng GNLA kala pynpaw ba ka long kaba la kloi ban wan sha ka miej jingiakren ia suk hynrei kumba ka long mynta na ka liang jong u myntri rangbah ka jylla u Dr Mukul Sangma ym pat ai kano kano ka dak la ka sorkar kan pdiang ne em ia kane ka jingtyrwa.
Dei tang ka myntri kam poh iing ka Kong Roshan kaba la long ba ka sorkar ka hap ban ia kren bad ka sorkar pdeng.
Ha kane ka jingtyrwa ban ia kren ia suk nalor u Sujit Dey, yn don ruh u phadar Januarius Sangma, Rev Bro Insting C Marak, Rev Bro. Boomimerin C
Marak, Dr Jova Marak, M. D. Shira, Tonti Marak, Jaynie N Sangma,
Babyana M Sangma, Marilyne D. Shira, Roger Benny A Sangma and R D
Shira.
Kane ka unified peace movement kala pynlong ia ki jingialang paidbah ha sawdong jong ka Garo Hills ban ia kren bad ban wan ia ka jingsuk ba ka sorkar ka dei ban khot ia ka jingiakren ia suk.
Wat la ka sorkar ka la dep ban khot sha ka jingiakren ia suk hynrei na ka liang jong ka GNLA kam kwah ban ia don lang bad ka seng ANVC, namar ka jingdawa jong ka seng GNLA ka long ban ioh ia ka Garoland bad ki pud sawdong jong ka ki dei ban long na ki pud sawdong kumba ka long mynta.(SP News)
