Shillong, jymmang 12: U Bah Embhahlang B. Syiemlieh, MLA ka Mawlai Constituency, u la hiar sha shnong Mawiong Umjapung, Shillong ban iakynduh ia ki nongialam shnong ryngkat ruh ka jingiadon lang ki heh ophisar na ka tnat PWD ban jurip ia ki surok khyndew kiba dang ieh shrah na ka bynta ban thawlad ia ki lad ki lynti ban ioh siangrong noh.
Kiba bun na kine ki surok khyndew, ki dei kiba iasoh bad ka surokbah National Highway-44. Na ka jingsdang kharoi jong ki nongshong shnong bad ka jingmih ki ing kiba thymmai, kane ka shnong ka la donkam ban ioh ia ki surok rong khnang ban pynsuk ia ki paidbah ha ka leit ka wan.
Ha kane ka sngi la synran lang ruh da u Bah Rilang Lyngdoh, Engineer ka PWD bad u Bah Y. Lytan, SDO, u Bah Anthony Kharkongor, Rangbah Shnong ka Mawiong Umjapung, ki nongialam shnong na ka Dong Nongneng A,B bad C, kynthup ruh na ka Dong Tariang A bad B bad na ka Dong Rumnong.
Ki tei ki Dong ki dei kiba la don lypa ia ki surok khyndew ha kaba ki nongialam shnong ki la pynpaw ia ka jingkyrmen ba u MLA un ialeh shitom ban wanrah ia ki skhim na ka tnat PWD khnang ban dup ioh siangrong ia kine ki surok khnang ban pynsuk ia ki paidbah ha ka leit ka wan bad khamtam ban iada na ka jingbtuit khamtam mynta ba la wan ka aiom lyiur.
U Bah Embhah, u la pynpaw hakhmat ki nongialam shnong ba kin iai shah shipor bad ban ai ka jingiatreilang bad u kum u Nongmihkhmat khnang ban dup ioh pynurlong ia ka jingangnud jong ka shnong baroh kawei.(SP News)
