Shillong,Naiwieng 06: U Deputy Commissioner ka East Khasi Hills District u Abhilash Baranwal mynta ka miet dalade u la leit ban ia kynduh ia ki longkmie kiba pynlong ia ka jingiakhih shong kyllain mungor ha khmat dur mot u Woh Kiang Nangbah ban kyntu ia ki ba kin leit phai shwa sha iing sa bteng pat ia ka jingiakhih ha ka sngi kaba bud.
Haba kren ha ki lat pathai khubor ha ka por ba u leit sha ka jaka ba don ka jingiakhih shong kyllain mungor u la ong katkum ka jingbit kaba la ai ka long tang haduh ka por 4 baje janmiet hynrei haduh ka por 7 baje ruh ki dang don ha katei ka jaka bad kane kila pynkhein ia ki kyndon ka ain.
Hynrei na ka liang u DC u la ong namar kiba bun ki dei ki longkmie kumta na ka bynta ka koit ka khiah ka jong ki u la kyntu ba kin ia leit noh shwa sha iing bad ki lah ban bteng biang ia ka jingiakhih ka jong ki ha ka sngi kaba bud.
U Deputy Commissioner u la ong ba u dang iakren ia ki ban pynsngewthuh hynrei ia mynta hi ki dang ong ba kin dang don shwa hangtei hynrei na ka liang ki Magistrate ki Pulit kiba don ha kane ka jaka ki dang iakren, wat la kila pynkhein ia ki kyndon hynrei namar ba ki dei ki longkmie kiba la rangbah ka rta ba kim kwah ban don kano kano ka jingsngewthuh bakla kumta la kyrpad ia ki ba kin sngap ia ka jingkyrpad.
