Shillong, Naiwieng 06: U Secretary ka Khasi Hills Bazar Bus Association u bah Kyrshan Rynjah u la ong ba ki juh pynieng bus ha Iew Mawlong bad kumba ka long mynta na ka liang ka sorkar kala don ka jingthmu ban rah ia ki nongdie madan sha katei ka jaka kaba ki ju pynieng ia ki bus.
Haba kren ha ki lat pathai khubor ha Shillong Press Club mynta ka sngi 06/Naiwieng/2026 u bah Kyrshan u la ong ba kala don ka jingiakren hynrei kim pat ioh da ka jingthoh bad ha kajuh ka por na ka liang ka seng kam pat ai kano kano ka rai la kin pdiang ne em ban shah ia ki nongdie madan bad ki pat kin leit ieng noh sha kiwei ki jaka.
Hynrei mynta ka sngi kila ioh ia ka shithi kaba la bthah ia ki ba kin pyllait ia katei ka jaka kaba ju ieng bus hapoh ka 12 tatik mynta u bnai bad ki hap ban leit pynieng noh ia ki kali jong ki ha ka jaka ieng kaba don pyrshah bad ka Anjalee Cinema Hall.
U Secretary u la ong ba kane ka jingailad ka sorkar kaba tang shi taiew kala buh ia ki ha ka jingeh ba kin jubab ha ka rukom kaba dei kumta lyngba ki lat pathai khubor ki phah ia kane ka jingpyntip sha ka sorkar ba ka jingieng kali jong ki ha katei ka jaka kam dei shuh kaba dang mynta mynne.
La pynshai ba ki bus kiba ieng hangto kim dei kiba na sor ne khap sor hynrei ki dei kiba wan na ki lynti kiba jngai bad kine ki bus ym dei tangba ki kamai hynrei ki ai ka jingshakri ia ki nongrep kaba ki pynkit ia ki mar rep ban pynpoi sha Iewduh ha kajuh ka por ki dukan shnong ki kit tiar na Iewduh ban pynpoi sha shnong jong ki kan long kaba bha lada ki briew jong ka sorkar kin wan ban jurip ia ka jingtreikam ka jong ki.
