Shillong, Jylliew 10: Ka Indigenous Biodiversity & Social Welfare Organisation (IBSWO) kan pynlong jingialang paidbah ha Madan Tirot, Mission Mairang ha ka sngi Palei, 13 tarik u Jylliew 2013 na ka bynta ban pynpaw jingpyrshah ia ka jingthmu den um ia ka Wah Khri da ka Sorkar Assam.
Namar ba kane kan ktah nyngkong eh ia ki nongshong shnong jong ym duna 15 tylli ki shnong kiba hap hapoh ka Hima Nongkhlaw, ka Hima Rambrai bad Raid Mynsaw, ia ka hok long trai ia ka khyndew ka shyiap, ia ka trei ka ktah, ki khlaw ki btap, ki phud ki wah, ki sim ki doh kynthup bad iasnoh ha kaba wanrah jingkylla ha ka mariang bad kiwei, la kyrpad ia ki bakhraw ki batri bad ki khun ki hajar jong kitei ki ar hima bad rai.
La kyrpad ruh ia ki seng sain hima, ki sengbha lang kynthei bad shynrang, samla, samla pule, samla shnong bad baroh ki khun ki ksiew U Hynniewtrep ban wan khnang khnang sha katei ka jingialang paidbah ban pynpaw lang ia kajuh ka jingpyrshah.
La sngewthuh ba kin don ki nongmihkhmat jong ki seng pyrshah den um, ki seng ialeh ban ioh la ka hok na ki jylla bapher bapher jong ka thain shatei lam mihngi, kin ia don lang ha katei ka jingialang paidbah kum ka dak ka jingiasnoh kti ban pynneh bad pynioh ia ka hok ki trai muluk ki trai ri.(SP News)
