Maham u CEM ka KHADC ia ki mahajon ba pynkiew dor khamtam ha ki dukan shnong

Shillong, Iaiong  05: U Chief Executive Member, ka Khasi Hills Autonomous District Council, u Bah Titosstarwell Chyne, u la maham iaki Mahajon ba kidei ban die ia ki marbam mardih sha baroh ki paidbah bad kim dei ban shim kabu ruh ha kaban die ha ka dor kaba heh.

U Bah Titosstarwell Chyne, kane ka jingmaham ka long hadien ba u la ioh ia ki jingujor na ki paidbah khamtam na kito kiba buh ia ki dukan shnong halor ka jingbym ioh iaki marbam mardih na ki Mahajon bad bun ki paidbah kila hap ban thied ia ki marbam mardih ha ka dor kaba rem.

“Nga maham jur ia baroh ki Mahajon kiba don ha u pud u sam jong ka KHADC ba kim dei ban buhrieh iaki marbam bad kim dei hi ruh ban die ha ka dor kaba rem bad lad aka Council ka lap ba ki Mahajon ki shim kabu, ka lah ban pynduh syndon iaka Lisen Khaii jong ki Mahajon” ong u CEM ka KHADC.

U la ong, ka sorkar bad ki Mahajon kila pynbna ba ka marbam mardih ka bun, hynrei katkum ka jingujor kaba u la ioh, la pyntip ba bun kim ioh ban thied iaki marbam mardih bad kane kala buh ha ka jingjynjar ia kiba bun ki nongdie ban pynbiang iaki marbam mardih ha ki shnong ki thaw.

U Bah Titosstarwell u la ong, ki mahajon kim dei ban shimkabu ha kum kane ka khyllipmat hynrei kidei ban ialeh ban pynbiang ia ki marbam mardih sha baroh ki paidbah khnang ba ki shnong kiba don ha ki thain nongkyndong kin nym mad ia kano kano ka jingkyrduh bam.