Jowai, Jylliew 14: Na ka liang jong ka JYF ka sngew kyndit ban tip ba ka sorkar ka don
jingthmu ban pynkynriah kam ia u DC West Jaintia Hills bah P.S Dkhar khlem pat dei por katkum ka samoi treikam jong ka Sorkar, hynrei kumba ngi tip ba u DC u dangtrei tang kumba 11 bnai ei ei naduh ba u shimti ia la ka kam kum u khliehduh jong ka District ong u bah P.Majaw president jong ka JYF.
Ka ne ka jingthmu jong ka Sorkar ka dei tang ka daw shimet jong ki katto katne ki khwan myntoi shimet, ki bym don ia ka jingkit khlieh ia ka roi ka par bad ka shynshar ka khaddar hapoh jong ka District baroh kawei, imat tang ka daw bym biang ka kam lajong ki kloi ban phah pynkynriah noh khlem pat dap 3 snem ka jing shakri jong u hapoh ka District katkum ki kyndon treikam jong ka sorkar,
Hynrei katkum ba ngi lap bad shem ia ka rukom treikam jong u DC bah P.S Dkhar, la shem ba u biang eh bad treihok ia ka kam kumba la bynshet ha u, haba dang tang 11 bnai ba u wan shimti ia ka kam la iohi ia u soh ka jingtrei shitom jong u ki la sawa jam ha baroh kawei ka District.
Ka Seng ka pyrshah jur ia ka ne ka jingthmu jong ka sorkar ban pynkynriah jubor ia kum kine ki Officer kiba don ka jingkitkhlieh ia ka iap ka im jong ki paitbah.
Kumjuh ruh ka Seng ka ong ba ka jingsngew kyndit ka long ba ka don ka jing suba jur ba ka jingkwah jong ka sorkar ban pynkynriah kam ia u bah P.S Dkhar, imat dei tang na ka daw ba u pynmih ia ka hukum ban khang pyrshah ia ka jingtih mawshun ha Amlarem Sub-Division da ki katto katne ki heh spah jong ka thain war jaintia kiba la pynjot bad leh beijot ia ka mariang bad ki sawdong sawkun jong ka, kat haduh ba
ki nongshong shnong jong ka thain ki don hapdeng ka jingkyrduh umbam umdih na ka daw ka jingleh pyrshah bad bym salia ki ne ki khwan myntoi, la kynnoh ka JYF.(SP News)
