Ong u Prof Asis dutta, ki samla ka NE ki dei ban phai sha ka rep ka riang

Killing , 9^th Mile 9^th July: U Prof. Asis Dutta, Padma Bhushan awardee, u wei na ki scientist u ba dei ruh u  Vice Chancellor barim jong ka Jawaharlal Nehru University, Delhi, u kyntu ia ki samla ka dang shatei lam mih ngi ba ki dei ban phai sha ka rep ka riang namar ka dei ka jingdon kam kaba ha khmat eh ia kane ka thain baroh kawei.

U Prof Dutta u dei u ba la pyntbit kyrpang ia lade ha ka  Genetic Engineering bad Biotechnology. U Prof. Dutta mynta ka sngi u la leit jngoh ia ka jaka pule ka  University of Science and Technology, Meghalaya (USTM) kaba don ha  9^th mile. Ha kane ka jingleit jngoh ka jong u ia kane ka jaka u la ong ba kane ka thain ka long kaba sei soh bha bad lada pyndon kam ia ki juk stad kiba mynta ka rep ka riang kan roi.

U Prof Dutta u la ong ba ka  Science ka dei ka jingiaid lynti yn kaba kut bad ka jingiaid ka dang long tang ka jingsdang.  U la ong ba lada pyndonkam da ki symbai kiba la tip kum ki Genetically Modified (GM) kane ka thain kam dei tang ba ka lah ban pynbiang bam ia lade hynrei kalah ban shallan ruh sha ka pyrthei.

U Prof. Dutta u la ong ba ka jingdon briew ha ka pyrthei ha u snem 2050 kan kot sha ka 10 billion ngut bad kane kan pynlong ia ka pyrthei ba ka dei ban pynmih tam ia ka jingbam da 1.7 shah na kaei kaba mih mynta.

Kumba ka long mynta ka pyrthei ka ia kynduhia ki jingeh ha ka liang ka rep ka riang na ka daw ba ka kyndew kala kylla shrah, ka jingrang tyrkhong, ka jingbun jong ka um mluh kine ki long kid aw ban pynduna ia ka jingmih ha ka rep ka riang bad ban pynlait ia kata dei tang ki symbai kiba la pynmih kyrpang ia kiba la tip kum ki  Genetically Modified crops bad ka por mynta ka la poi ba ki briew kinphai sha kitei ki symbai kiba bha.(SP News)