Tura, Naitung 22: Ki Shipai Border Security Force (BSF) ha dien ba ki la ioh ia ka jingtip kaba biang ki la bat ia kawei ka kali Alto Maruti kaba don ia u number AS-01-AZ-2930 katba ka dang leit na Tura sha Daku. Na kane ka kali ki BSF kila ioh ban kurup haduh 500 bilor ka dawai Phensedyl.
Ki shipai BSF kila ioh ruh ban kem ia saw ngut ki briew kiba don ha kane ka kali bad kito ki long u Nazimuddin, Anwar Hussain, Ziarul Haque, bad u Noor Islam,baroh ki dei na ka shnong Howli, jong ka Barpeta District jong ka jylla Assam.
Na kine ki briew ki BSF kila ioh ban kurup T.3160 tyngka, saw tylli ki mobile, ka driving license, ka pan cards ka ATB card jong ka SBI bad na u Nazimuddin ki la ioh ban kurup ia ka Identity Cards jong ka seng Indian Youth Congress.
Ha ka jingtohkit kine ki briew ki la iathuh ba ia kane ka dawai pynbuiad la rah banleit ai sha u Hirul Mandal jong ka shnong Cherringpara kaba don hapoh jong ka South garo Hills District. Ha dien kane na ka liang jong ki BSF bad ki pulit ki la leit ban khynra ha katei ka shnong bad ki la ioh ban kem sa ia u Bishin Sangma .
Kine kiba shah kem ki la phla ba ki la wanrah ia kane ka marblak na Cooch Behar u wei u briew u ba shllan ia kine ki dawai dih pynbuaid.(SP News)
