Jowai, Nailar 11: Ka Jaintia Youth Federation (JYF-EJH) East Jaintia Hills, ka pynpaw ia
ka jingsngewnguh shikatdei eh ia ka jingshahskhor jong ka sorkar ha ka ban pynioh ia ka office jong u District Transport Officer (DTO) ha East Jaintia Hills District, kaba dei ka District ba thymmai kaba dang shu dep dap shisnem mynta.
Ka JYF ka ong ba ka jingioh ia ka office DTO ha ka East Jaintia Hills ka dei ka jingkyrkhu kaba khraw ia ka District bad ia ka thain hi baroh kawei, namar ka iarap shibun eh ia ki briew jong ka thain ban ioh ia ka jingshakri kaba kham jan shuh shuh bad ki paitbah ban nym leit shuh sha jowai na ka bynta ki jingdonkam ha ka ba ia dei bad ki kam kali jong ki.
Ka East Jaintia Hills District ka dei ka thain ba bun eh ki kali private kiba kamai laitlan katba mon na ka daw ba ngim pat don ia u DTO u ban peit ia ka ban sylli ia ka jingkamai beain jong ki kali
private khlem ki kot ki sla ki ba biang ha ka ba la mih teng ka jingia kulmar hapdeng ki kali kamai kiba la don ia ka lacal taxi permit bad ki kali private kiba kamai beain ong u samla John Pala Secretary ka JYF-EJH.
Ha ka por ka ba dei biang ka sorkar lyngba u myntri ka Transport ki la ia leh shitom ban wanrah ia ka jingmyntoi na ka bynta ban pynsuk shuh shuh ia ki paitbah jong ka District da kaba wanrah ia kane ka office ba shibun na ki khun samla khlem kam khlem jam kin ia ioh ban rung kam ha ka ne ka office kumjuh ha kiwei kiwei ki tnad bapher bapher jong ka sorkar ki ban sa plie shen ong u tei u Secretary.
Na ka liang u Samla Niwasly Rymbai President jong ka JYF-EJH, u pynpaw ia ka jingsngewnguh ka ba khraw ia ka sorkar ba ka sngap bad shahskhor ia ka jingdawa ba donkam eh, kumjuh ruh ia ki ar ngut ki MLA na East Jaintia, u bah Hopeful Bamon bad u Bah Justin Dkhar kiba ki la ialehshitom ban iai buddien ia ki jingdawa kiba donkam kyrkieh hapoh ka District namar ba naduh ba la pynkha ia ka East Jaintia Hills District tad haduh mynta, ki paitbah ki dang ia beh shaduh jowai ban ioh ia ki Number Registration bad kot kali, hynrei mynta pat kan pynsuk bad pynkmen ia ki paitbah kiba la angnud baroh shikatta ban ioh noh la ka jong ka office DTO ha East Jaintia Hills District ong u tei u nongialam.
Ha ka juh ka por ruh ka seng ka dawa na ka sorkar ban pynkloi ban wanrah noh sa ia kiwei kiwei ki tnad treikam jong ka sorkar khnang ba ki samla bym don kam don jam kin ioh ban ia rung kam ha ki tnad bapher bapher jong ka sorkar. Ka jingioh kam jong ki khun samla ka District kan long shisha ka jingkyrkhu bad jing myntoi ki ban pynkylla dur ia ki longing longsem jong ka East Jaintia Hills District.
Kumta na ka liang ka JYF-EJH ka kyntu ia ka sorkar ba kan pynkloi noh ban plie ia ka ne ka office thymmai kum ka dak ka jingsdang jong ka roi ka par bad ka jingkyrkhu ia ki nongshong shnong jong ka District hi baroh kawei pynkut u kyrwoh khubor na u samla John Pala Secretary ka JYF-EJH. Ha ka kyrwoh kaba la phah da u Bah John Pala general secretary jong ka JYF.(SP News)
