Shillong, Nailar 31: Mynta ka sngi “Ka Sur ki Nong-Mawlai” kila leit ban ia da ka jignthoh sha ki myntri ka sorkar MDA bad kum juh sha ki MLA jong ka iing dorbar thawain ka jylla kiba dei na Khasi Hills ban dawa ba ka sorkar ka dei ban weng kam shipor ia ki pulit kiba don kti ha kaba sait iap ia u bah Cheristerfield Thangkhiew.
Ha ka shithi kaba kila ai mynta ka sngi sha ki myntri sorkar bad kum juh sha ki MLA, kila dawa ba ka sorkar ka dei ban weng kam shipor ia u SP jong ka East Jaintia Hills District u Jagpal Singh Dhanoa bad ia u SP Traffic Shillong u Shailendra Bamaniya ha kaba ka “Sur ki Paidbah Nong-Mawlai” kila kynnoh ba dei kitei ki ar ngut ki heh pulit kiba la don kti ban sait iap ia u bah Cheristerfield Thangkhiew.
Kane ka jingdawa ban weng kam shipor ia kitei ki pulit kiba la shah kynnoh ba ki don kti ha kaba siat iap ia u bah Cheris ha ka 13/8/2021 ka long ban wan rah ia ka jingtohkit kaba khuid bad ban pynshitom katkum ki kyndon ain, ka Sur ki Paidbah Nong-Mawlai ka buh ka jingkylli ba kumno yn ioh ia ka jingbishar kaba khuid haba ki briew ki dang don ha ka kam.
Ka Sur ki Paidbah ki Nong-Mawlai kila pynkynmaw ba u bah Chersiterfield Thangkhiew dei ba la wan phai bad aiti ia lade ha khmat ka sorkar MDA ha u snem 2018 u la wan phai sha ka imlang sah lang namar u kwah ia ka jingsuk kan don hapoh ka Ri bad u la shongthait na ka kam HNLC.
Ka Sur ki Paidbah Nong-Malai ka pynpaw ia ka jingsngewsih ba lada na Shilliang Duriaw ka sorkar kala lah ban pdiang burom namar ka jingim kaba thymmai ka jong u, balei na Mawlai Kynton Massar balei kam lah ban khot ia kren ia u lada ka don kam namar u long ruh u briew u ba kloi ban ia treilang.
Kane ka jingsiat iap bala lam khmat da ki pulit ka jylla, ka wanrah ka jingsuba sniew ha kaba ki khlem khmih lynti ba ki briew jong ka ain kin thombor da kane ka lynti, ha kane ka sngi ka Sur Ki Paidbah ki Nong-Malwai kila ioh ban ai ia ka jingthoh mar khmat sha ki 14 ngut ki MLA bad ia u bah Prestone la shu ai ha ophis. Ia ka shithi la soi da ki 11 ngut ki riew paw khmat na Mawlai.
