Shillong, Naitung 28: Ki paidbah nongshong shnong jong ka jylla Meghalaya ki shim ba ka Tara Ghar ka dei ka iing sorkar kaba la mang na ka bynta u myntri rangbah jog ka jylla, namar ba u myntri rangbah ba nyngkong jong ka jylla Meghalaya u Captain W A Sangma bam kwai ha dwar u blei u la sah ha kane ka iing hynrei na ki jingjia ba sngewsih u la mih noh na kane ka ing sorkar.
Haba ka jylla Meghalaya kala ioh iaka jylla ba pura haka 21 tarik Kyllalyngkot 1972 u myntri rangbah ba rim ka jylla u la shong ha kane ka iing hynrei na ki jingjia kiba la wan ha ka iing jong u hap ban kynriah jaka noh.
Ha ba u Bah Darwin Diengdoh Pugh bam kwai ha dwar u blei haba u la wan kum u myntri rangbah ka jylla ym shym la sah ha katei ka iing, kum juh ruh u Bah BB Lyngdoh bam kwai ha dwar u blei kum umyntri rangbah ka jylla ym shym la sah ha katei ka iing jong ka sorkar.
Haba u Purno A Sangma u la wan shimti ia ka kam myntri rangbah u la sah ha katei ka iing sorkar ha kaba ka sorkar jong u ka la neh tang 779 sngi bad ka la shah phynkhyllem noh. Haba u Bah DD Lapang u la wan kum u myntri rangbah ha ka sien kaba nyngkong u la kyntiat banshong ha katei ka iing hynrei u la shu pynlong ia ka kum ka ophis, hynrei u la rem noh ha ka election 1993.
Ha ka dien ka election ha u snem 1993 u SC Marak u la long u myntri rangbah ka jylla haduh ban da kut ka san snem jong u ha u snem 1998, ha dien ka election 1998 u la wan biangkum u myntri rangbah ha kaba ka sorkar jong u ka la neh tang 13 sngi bad ha u snem 2003 u la rem syndon ia ka election.
Haba u Bah BB Lyngdoh ba la khlad noh u la wan biang kum u myntri rangbah ka jylla ha u snem 1998 ym shym la shong ha katei ka iing hynrei ha u snem 2000 u la hiar shuki noh ban ailad ia u Bah E K Mawlong bam kwai ha dwar u blei kum u myntri rangbah, u bah Mawlong u la leit ban sah ha katei ka iing hynrei ka sorkar jong u kala shah pynkhyllem noh ua u snem 2001.
Ha dien u bah EK Mawlong la wan long myntri rangbah u Dr FA Khonglam bam kwai ha dwar u blei ha u snem 2001 hynrei u Dr Khonglam ym shym la sah ha kane ka jaka u la pynlong ia ka kum kakynja ophis, hynrei ha u snem 2003, ym shym la ia khun shuh ia ka MLA kum u Independent hynrei u la ia khun na ka seng HSPDP.
Ha dien ka Election 3003 u Bah DD Lapang u la wan biang kum u myntri rangbah ka jylla hynrei ymshym la sah ha kane ka iing sorkar. Haba la khyllem ka sorkar jong u Bah Lapang La wan u bah JD Rymbai kum u myntri rangbah ka jylla bad u la sah ha kane ka iing hynrei ha dien shisnem ka sorkar jong u kala shah pynkhyllem ym tang kata hynrei u la shah pynduh tiket na ka seng Congress bad u la jop ia ka election MLA na Jirang na ka seng UDP.
Ha u snem 2008 ha dien ka election u Dr Donkupar Roy u la wan kum u myntri rangbah kajylla hynrei ym shym la leit ban sah ha katei ka jaka. Ha u snem 2009 haba ka sorkar u Dr Donkupar kala khyllem la wan biang u Bah DD Lapang kum u myntri rangbah ka jylla hynrei ym shym leit sah ha katei ka iing sorkar. Ha u snem 2010 haba u Dr Mukul Sangma u la wan kum u myntri rangbah ka jylla u ruh u khlem leit sah ha katei ka iing sorkar bad ha kane ka sien kaba ar jong ka jinglong myntri rangbah ka jong u ruh yn shym la sah ha katei ka jaka.
Kaktum ki jingtip kiba la ioh da u SP News Agency ki iathuh ba ka Tara Ghar kam dei ka iing bangla kaba la mang na ka bynta u myntri rangbah ka jylla, ka shu leit jia ba ka tand GAD ka juh ai ia katei ka iing ia ki myntri rangbah ba kin sah, kumba ka long haduh mynta kam pat don kata ka jingbuh kyrpang na ka sorkar ia ka iing ban sah u myntri rangbah ka jylla.(SP News)
