Shillong, Jymmang 21: Ka Dorbar Shnong Nongspung hynne ka sngi ka la aiti da ka Dorkhas ha u Myntri ka Tnat Tourism u bah Paul Lyngdoh ban dawa jingiarap pisa ban kyntiew ia ka kam jngohkai pyrthei hapoh ka shnong.
Ia ka kynhun jong ka Dorbar Shnong Nongspung la ialam da u MLA ka Mawphlang Constituency u bah Mathew Beyondstar Kurbah ha ka jingdonlang u Acting Syiem ka Hima Nongspung u bah Kyntiewborlang Syiemlieh, u Sordar u bah John Worth Born Kharmyndai
Haba kren sha ki nongthoh khubor u MLA ka Mawphlang u bah Mathew Beyondstar Kurbah u la ong ba ha ka jingialang bad u myntri ka tnat Tourism ki nongialam ka Dorbar Shnong Nongspung ki la pynpaw halor ka jingdonkam ban pynneh pynsah ia ka Mawsangri kaba dei ka jaka jngohkai kaba itynnad.
U bah Kyntiewborlang Syiemlieh u la iathuh ba ha katei ka jaka la tip kum ka Mawsangri, katei ka jaka ka don ia la ka khana ba la hiar pateng ba ka dei ka kmie jong Kyllang bad Symper, u la ong ba katei ka kmie ka jaw ummat ia ka jingïakhun u kyllang bad u Symper bad tad haduh ki por mynta ruh ka don ka um ka ba mih na ka kaba la ong ba ki dei ki ummat jong ka kmie.
U la iathuh ba najrong u trei u maw ka long ka jaka ka ba itynnad bha ban shongkai bad ban peitkai namar ka jaka ka long halor, lah ruh ban iohi shynna ia ka shnong Mawkynrwat bad ia ka shnong Mairang.
“Namar kata ka Dorbar Shnong ka sngew ba donkam ban pynneh pynsah ia ka Mawsangri da ka ba pynkylla kum ka jaka jngohkai pyrthei khnang ba ka khana halor kane ka jaka kan pawnam kum ba paw u Kyllang bad Symper” la ong u bah Syiemlieh.
U bah Mathew Beyondstar Kurbah u la iathuh ba kane ka jaka ka donkam ia ka lynti ban iaid kjat ba kane ka jingshna kan nym ktah ia ka jingitynnad jong ka mariang, na ka jaka ba poi kali, kumba 1kynta eiei hap ban iaid kjat ban poi shaduh katei ka jaka ba don utei u maw ba itynnad.
U bah Mathew Beyondstar Kurbah u la iathuh ba halor ka jingpynsngew jongki, u myntri ka tnad Tourism u bah Paul Lyngdoh u la pan ia ka Detail Project Report (DPR) khang ba ka sorkar kan nang ban pynkhreh ia ka jingpynmang tyngka ia ka jingpyntrei ia katei ka jaka.
