Ampati, Jylliew 24: Kum shi bynta jong ka District Nutrition Leadership Programme (DNLP), iaka jingbud ryntih jong ki camp jong ka koit ka khiah, la dep pynlong ha ka 23 tarik Jylliew ha kylleng ki shnong nongkyndong jong ka South West Garo Hills da ka tnad ka koit ka khiah ha ka jingiatreilang bad ka Integrated Child Development Services (ICDS), ha kaba kane ka camp ka thmu ban nang pynbha iaka jingpynbna shaphang ka koit ka khiah jong ka imlang ka sahlang bad ka bam ka dih.
La dep pynlong iaka camp ka koit ka khiah ha ka shnong Grenggandi, ha kaba 48 ngut ki nongioh jingmyntoi kiba la dep test ialade. Napdeng kine, haduh 38 ngut kiwei pat ki riew shimet kila dep phah khmih bniah ialade ne test na ka jingpang duna snam bad ym don ba don kane ka jingpang.
La bynrap ba haduh 25 ngut kiba la heh ka rta kila dep test ialade na ka bynta ka jingpang hypertension ne BP bad shini, katba ae ngut kiwei ki longkmie ba armet kila dep eksamin ialade bad ioh iaka jingai jingmut.
Kum kane hi kajuh ka camp jong ka koit ka khiah, la long ha ka shnong Boldakgre, ha kaba la iashim bynta haduh 62 ngut ki dkhot ka imlang sahlang. Ki nongtrei jong ka koit ka khiah kila dep test iaki jingpang bym ia bit haduh phra ngut, katba iaka tuberculosis (TB), la don haduh 21 ngut kiba la dep test bad ka koit ka khiah ka kmie.
Haduh san ngut ki khynnah kila ioh iaka jingai tika bad kiwei kiwei. La pynlong iaka jingialang pynsngewthuh shaphang ka koit ka khiah, ka bam ka dih, jingleh khuid bad ki jingpang.
Ia mynta, ha Rongsang Abagre, ki nongtrei ka koit ka khiah kila dep test iaki jingpang bym ia bit, TB bad duna snam. La pynlong ia kane ka camp ruh bad ki prokram pynshai kiba thew ha ka thoh ka tar ban iada na ki jingpang, ka jingbam kaba tei ka met bad ka jingdonkam ban phah check met barobor.
Ka tnat Ka koit Ka khiah kala pynpaw ba kine ki jingtreikam shabar ki don ka bynta kaba kongsan ha ka ban lap kloi iaki jingpang, ka jingkyntiew iaka koit ka khiah ka kmie bad u khyllung bad ka pynphriang iaki khubor koit ka khiah kiba kongsan hapdeng ki shnong nongkyndong.
Ka tnat ka la pynskhem biang iaka jingkut jingmut jong ka ban pynkhlain iaki lad sumar koit ka khiah bad ban pynbha iaki jingmih na ka koit ka khiah lyngba ki jingtreikam man ka por kiba shong ha ka imlang sahlang.
