Shillong, Jylliew 24: Ka seng Hynniewtrep Achik National Movement (HANM) kala ai jingiarap ia ka skul jong ka balang Presbyterian kaba don ha ka shnong Umsyai da ki tin namar ba ka la shah pynjulor ha ka eriong mynta u bnai.
Ka seng HANM jong ka Ri Bhoi District ha ka jingialam jong u bah Khrawpyrkhat Thongni u ba dei u sekretari ba peit ia ka pla pisa ha ka jingdon lang u bah Batskhem Syngkli ba peit ia ka tnad pule puthi, u bah Warmshal Makdoh u ba dei u President ka Eastern Zone lem bad ki dkhot kila leit ban ai da ki tin ban sop ia ka skul.
Ka skul kaba kila ai jingiarap la tip kum ka Umsyai Mawlamase Presbyterian LP School kaba don ha Mawhati Konstitwensi, ia kane ka jingaisngewbha la pdiang da u bah Liswit Kharmuti u ba dei u nonghikai bad u Secretary ka Skul Managing Committee jong ka Skul Umsyai Mawlamase Presbyterian LP School.
Kane ka skul ka don naduh klass Arit haduh klass kaba san bad mynta kala dei ka por ba hap ban pynlong ia ka eksamin shiteng snem, wat la ka tnum ka iing skul kala shah rong ha ka eriong na ka liang jong ki nongpyniaid skul ki hap ban pynlong ia ka eksamin ia ki khynnah skul.
U bah Liswit Kharmuti u ba dei u nonghikai ba dei peit ia kane ka skul bad u sekretari ka Skul Managing Committee u la iathuh ba kane ka jingshah lyngshop jong ka skul ha ki bor ka mariang kala jan dap shi bnai haba iadei bad kane u la buh ruh ka jingkyrpad sha ki Nongmihkhmat bad sha ka Sorkar Jylla ba kan iarap ia kane ka skul.
