Shillong, Naiwieng, 17: U Myntri Rangbah ka jylla u Conrad K. Sangma mynta ka sngi 17/Naiwieng/2026 u la pynmih ia ka MeghGo, kaba dei ka rynsan Unified Mobility ha ka prokram kaba la dep pynlong ha U Soso Tham Auditorium ha ka jingiadon lang u symbud myntri rangbah ka jylla u bah Sniawbhalang Dhar bad kiwei kiwei ki ophisar jong ka tnad transport.
Haba ai jingkren u Myntri rangbah ka jylla u Conrad u la ong ba ka jingwanrah ia ka MeghGo, kaba dei ka rynsan ka ‘Unified Mobility Platform’ jong ka jylla ka dei ka sienjam kaba kongsan ha ka lynti jong ka jingwanrah thymmai ha ka kam pynroi halor ka koit ka khiah bad ka leit ka wan.
Kane ka app iaid lynti kan kyrshan ia ki nongniah kali da kaba kan ai shibun ka kabu khlem da shah dain kuna ia ka pisa ia ki nongniah taksi, kynthup ia ki auto bad ki kali ar shaka khnang ban pynsuk bad pynkiew ia ka jinglah ki nongleit nongwan ban ioh kali u la ong ba ka thong kaba kongsan ka dei ban pynbha ia ka rukom trei kam bad ban pyntikna ba ki nongwan jngohkai bad ki nongshong shnong kin ioh ia ka jingkit ka jingbah kaba stet, kaba kham duna dor bad kaba long ryntih.
Ka MeghGo ka dei ka rynsan lane ka app kaba pyniasoh iaki kali bad ki jingshakri ia ki paidbah bad ka dei ruh ka rynsan iaid kali kaba dei jong ka sorkar, ha kaba la don ki ing shongkai bad ka kam jngohkai, ka kam rep kam riang bad ki nongrep bad ka ai ruh ia ka lad kamai kajih bad ka jingbteng ban pynbha ia ka imlang sahlang.
Kane ka rynsan kan ai ia ka jingtreikam kaba paka, ha kaba iadei bad ki jingshakri ia ki kali kamai saw shaka, ki kali ar shaka bad kiwei kiwei ki jingshakri kiba la dep pynmih shen. Ka jingshakri ia ki nong jngohkai pyrthei da ki kali, ka jingkhrong tiket jong ki bos bad kiwei kiwei, ka jingshakri na ka bynta ban pynieng kali bad kiwei kiwei ki jingshakri.
Kane ka app ka lah ban kyrshan da ka ktien phareng, Khasi, Garo bad Hindi ha kaba la pynlong ban pynsuk iaki paidbah ka jylla don ruh ki kiwei kiwei ki jingshakri ba kynthup ia ka jingbatai jong ki jaka ba thmu ban leit ki briew lyngba ki phone nombar ba lah ban tikna bad ki nombar ban phone haba don kano kano ka jingma bad kiwei kiwei ki jingshakri.
Ka rukom pyniaid kali paidbah ba la pynkylla bad pynkhuid da ka technoloji kaba pyni kumno ki kali ki don ha ki 39 tylli ki surok lane lynti ha jylla khnang ba ki nongniah bad ki nongleit nongwan kin iohi lypa lada ki don jaka, ban pynduna ia ka por ba thylli bad ban pynduna ia ka jingdheng kali.





