Pynlong ka NITI Aayog ïa ka National Workshop “Leadership as a Mission”

Shillong, Naiwieng 17: Ka NITI Aayog ha ka sngi Ba-ar ka la pynlong ïa ka National Workshop halor ka phang “Leadership as a Mission” ha Bharat Mandapam, New Delhi, ban ïasam bad ban bishar bniah ïa ki jinghikai na ka jinglong nongïalam jong u Myntri Rangbahduh ka Ri, u Narendra Modi, ha kine ki 25 snem.

U Myntri Rangbahduh u la shimti ïa ka kam kum u Myntri Rangbah ka jylla Gujarat ha u Risaw 2001 bad hadien kum u Myntri Rangbahduh jong ka India ha u Jymmang 2014, bad naduh katei ka por u la bteng ban ïalam ïa ka Sorkar ha ka jylla Gujarat bad hapoh ka Sorkar Pdeng khlem sangeh.

Ha baroh kine ki por, u la shim ïa ka kam ha ka jingshakri paidbah kum ka jingthmu ba kongsan jong ka jingim jong u.

Ka jingbatai jong u ïa lade kum u “Pradhan Sevak” ka pyni ba ki nongshong shnong ki dei ban long kiba don ha pdeng jong man la kawei pa kawei ka kam jong ka Sorkar, bad ki nongrim jong ka Antyodaya, Jan Bhagidari bad Sabka Saath, Sabka Vikas, Sabka Vishwas, Sabka Prayas ki la long bynta kiba kongsan ïa ka rukom synshar lada ka long hapoh ka jylla ne hapoh ka sorkar pdeng.

Kane ka workshop ka dei kaba nyngkong eh napdeng ki san tylli ki National Workshop kiba la thmu ban pynlong. Ki jingïatai bad ka jingsam ha kaba iadei bad ka jingshem da ki nongïashim bynta ha kine ki workshop yn pynkylla sha ki kot ai jinghikai na ka bynta ki jaka ai jinghikai ïa ki ophisar shakri paidbah jong ka Sorkar ha ki jaka pule bad ha ki skulbah.

Ha ka jingïaid jong kane ka jingïalang, yn rah sha khmat ia ki jinghikai na kine ki 25 snem lyngba ka jingwad bniah bad ki kot ai jinghikai kiba pyni ïa ki lynti ban pynïaid ïa ki polisi bad ka rukom treikam jong ka bor synshar ha ki snem ban wan haduh ka thong jong ka Viksit Bharat @2047.

Palat 900 ngut ki la wan shim bynta ha kane ka workshop, ha kaba 250 ngut ki la shim bynta beit ha ki jingïatai.

Ki nongwan shim bynta ki kynthup ïa ki Secretary bad ki ophisar ba rangbah na ka Sorkar Pdeng bad ki Sorkar Jylla, ki District Collector na ki Aspirational Districts, ki khynnah pule na ki jaka pule bad ki skulbah, kumjuh ruh ki nongïatreilang ha ka imlang sahlang bad ki nongïoh jingmyntoi na ki skhim ba kongsan jong ka Sorkar.

Ïa ki jingïaid jong ka workshop la pynphriang ruh lyngba ka rynsan iGOT Karmayogi bad ha ki jaka ai jinghikai lada ka long jong ka sorkar pdeng bad ka sorkar jylla,khnang ba ki ophisar na kylleng ka ri kin lah ban ïashim bynta ha kane ka prokram.

Ka workshop ka la sdang da ka jingrwai ïa ka National Song bad ka National Anthem, bud sa ka jingkren pdiang sngewbha na u Anurag Jain, Chief Executive Officer jong ka NITI Aayog. U la pynshai ba ka thong jong kane ka workshop ka long ban lum bad buh jingthoh ïa ki jinghikai na ka jinglong nongïalam jong u Myntri Rangbahduh ha kine ki 25 snem bad ban pynkylla ïa ki sha ki shlem jingtip ba neh hapoh ki tnat treikam jong ka Sorkar na ka bynta ka lawei.

U la kdew ïa saw tylli ki jinghikai kiba kongsan na ka jingïaid lynti jong ka jinglong nongïalam. Nyngkong, ka jingthmu ka dei ban kham kongsan ban ïa ka kyrdan ha ka kam, kaba pynkylla ïa ka jingpyrkhat na ka jinglong nongïalam jong uwei u briew sha ka thong treikam kaba ïatylli.

Kaba ar, ka jingshakri ka dei ban bujli ïa ka jingbthah, ha kaba ka rukom synshar ka dei ban pynleit jingmut ban poi sha u briew uba khatduh eh uba ieng ha lain. Kaba lai, ka jingsngewskhem na ka dohnud ka tei ïa ka bor ban ïaineh, kaba lah ban pynkylla ïa ki jingeh sha ki lad ban wanrah ïa ka jingkylla ha ka imlang sahlang. Bad kaba saw, ka jingai bor kaba shisha ka dei ban bteng wat hadien ba la kut ka jingïalam jong uwei u briew, lyngba ki kynhun treikam kiba khlain, ki kynhun briew kiba tbit bad ki rukom treikam kiba lah ban neh.

U Ashok Kumar Lahiri, Vice Chairman jong ka NITI Aayog, u la ai ïa ka jingkren sdang. U la ong, “Ka bynta jong ka jinglong nongïalam kaba khlain ha ka liang ka saiñ pyrthei bad ka jingshakri paidbah ka long kaba donkam bha ban pynïaid ïa ka jingïaid lynti jong ka India sha ka roi ka par. Ka jingthmu pynkylla jong u Myntri Rangbahduh ka Ri ka la wanrah ïa ka jingkylla kaba khraw ha ka jingthrang jong ka ri ban long ka ri kaba la kiew ha u snem 2047, kaba pyni ïa ka jingkylla jong ka ri sha ka ri kaba la roi, kaba riewspah bad kaba lah ban ïakhun ha ka pyrthei.”

U la pynpaw ruh ïa ka integrated roadmap jong ka NITI Aayog ban pynurlong ïa kane ka thong ban tei ïa ka ïoh ka kot jong ka ri kaba kot sha ka USD 30–40 trillion ha u snem 2047, bad ka jingmih jong ka ïoh ka kot na uwei pa uwei u briew kaba kot sha ka USD 15,000–18,000, kaba kyrshan da ka jingkiew jong ka GDP kaba shisha kaba 7–10 percent man la u snem.

Ha ka jingkren keynote kaba plie ïa ka workshop, u Dr. P.K. Mishra, Principal Secretary sha u Myntri Rangbahduh ka Ri, u la ong ba ka jingïaid lynti jong ka India ha ka liang ka synshar ka la sakhi ïa ki bynta kiba kongsan kiba pyni ïa ka bor jong ka jinglong nongïalam kaba shim rai kloi bad ka jinglah ban pynkylla ïa ka jingthmu sha ka kam ba la pyntreikam.

Naduh ka jingpynbeit kloi ïa ka jingjia jumai ha Kutch ha u snem 2001 haduh ka jingïakhun ba ïatylli jong ka ri pyrshah ïa ka khlam COVID-19, naduh ka jingpyniar ïa ka bynta jong ka India ha ka ïoh ka kot jong ka kam space ha ka pyrthei haduh ka jingktah kaba khraw jong ka Lakhpati Didi initiative, kine ki sienjam ki pyni kumno ka mon saiñ pyrthei kaba khlain, ka bor synshar kaba jubab kloi bad ka rukom treikam kaba ïaid katkum ka mission ki lah ban wanrah ïa ka jingkylla kaba don jingmut ha ka jingim jong ki paidbah.

U Uday Kotak, uba dei u nongseng jong ka Kotak Mahindra Bank, u la ong ba ka jinglong nongïalam jong u Myntri Rangbahduh ka Ri, u Narendra Modi, ha ka por ba u long Myntri Rangbah ka Gujarat bad hadien kum u Myntri Rangbahduh ka India, ka la ithuh beit ïa ka jingtrei kam sengkam sengjam kum kawei na ki nongpynkiew ïa ka ïoh ka kot bad ka jingtei ïa ka ri. Ka jingpynskhem ïa ki rukom kyrshan, ka jingpynkhlain ïa ki rukom treikam ha ka liang ka pisa tyngka bad ka jingïoh lad ban sengkam, bad ka jingmih jong ki start-up kiba bun ki pyni ïa kane ka jingkular.

U Dr. R. Balasubramaniam, u dkhot jong ka NITI Aayog, u la batai ïa ka rukom pynwandur bad ka jingpynbeit ïa ka workshop. U la ong ba kane ka workshop ka peit ïa ka jinglong nongïalam lyngba ki rai bad ki kam kiba pynpaw ïa ka, ha kaba ki jingïaid jong ka sngi ki la shah pynbeit ban ïaid naduh ka jingshem sha ka jingbishar bniah bad na ka jingbishar bniah sha ka jingpyntreikam.

Ki jingïaid jong ka workshop ki la bud ïa san tylli ki bynta kaba kynthup ban pynkhuid, bishar bniah, pynsngewthuh, pyntreikam bad kut jingmut.

Ha kine ki bynta, ki nongïashim bynta ki la ïoh jinghikai na ki jingïathuh kiba nyngkong eh shaphang ki rai kiba kongsan, ki la bishar bniah ïa ki lyngba ki jingïatai kiba kynthup ïa ki Sorkar, ki jaka pule bad ki paidbah, ki la pyrkhat biang ïa ki rukom treikam kiba lah ban neh ha ka jinglong nongïalam paidbah, ki la pyntreikam ïa ki jinghikai ha ki jingeh ha ka kam jong ki bad ki la kular ban wanrah ïa ki jingkylla kiba kyrpang ha ka rukom ïalam jong ki.

U la bynrap ba ka thong jong kane ka workshop ka long ban tei ïa ka kynhun jingtip jong India ha ka liang ka jinglong nongïalam paidbah, kaba shim ïa ki jinghikai na ki rai bad ki jaka treikam hapoh India, kiba yn pynwandur ïa ka rukom ai jinghikai ïa ki ophisar Sorkar bad ïa ka rukom ba kin ïalam ha ki snem ban wan ban pynlong i aka ri India ha u 2047 sha ka Ri kaba la roi bad kiew shaphrang ha baroh ki liang (Viksit Bharat 2047)

Ha ka session kaba dei halor ka jinglong nongialam, saw ngut ki nongkren ki la ïasam ïa ki jingshem jong ki hi shaphang ki bynta kiba kongsan jong ka jingjia bad ki jinghikai halor ka jinglong nongïalam kiba mih na kitei ki jingjia.

U Rajeev Topno, Additional Chief Secretary bad Principal Secretary ka tnad ka koit ka khiah ka Sorkar Gujarat, u la kren halor ka jingtei biang ïa ka Kutch hadien ka jingjia jumai ha u snem 2001.

U la pynpaw ba ka Kutch ha u snem 2001 kam dei tang ka jingïathuhkhana shaphang ka jingpynphai biang ïa ka jinglong kaba ju long mynshwa, hynrei ka dei ka jingïathuhkhana shaphang ka jingtei ïa ka jinglong kaba thymmai lyngba ka Jan Bhagidari, ki jaka treikam kiba khlain bad ka jingïatylli ha ka jingthmu.

Kane ka jingshem ka la pynpaw ïa saw tylli ki nongrim kiba kongsan jong ka jingsynshar kaba seisoh, kata ka jingthmu kaba shai bad ki rai kiba skhem, ka jingïatylli bad ka jingaiti lut, ka jingïashim bynta jong ki paidbah ryngkat ka jingkyrshan jong ka Sorkar bad ka jingtei ïa ki jaka treikam kiba khlain.

Ka Preeti Sudan, kaba dei ka Union Health Secretary bad Chairman jong ka UPSC kaba mynshuwa bad ruh ka dkhot jong ka Independent Panel for Pandemic Preparedness and Response, ka la ban jur ba hapoh ka jingïalam jong u Myntri Rangbahduh ka Ri, u Narendra Modi, ka jingïakhun jong ka India pyrshah ïa ka COVID-19 ka la kylla na ka rukom treikam kaba ïatylli jong baroh ki tnat Sorkar sha ka jingïakhih kaba kynthup ïa baroh ki bynta jong ka imlang sahlang.

Da kaba buh hakhmat eh ïa ka jingshngaiñ jong ki doktor, ki nos bad ki nongtrei ha ka por ba don ka khlam, ka teknoloji kum ka nongrim jong ka rukom treikam bad ka jingiatylli jong u paidbah ka ri ka la lah ban pynïaid ïa ka jingïakhun kaba ïatylli.

Lyngba ka seinjam kaba la tip kum ka Vaccine Maitri (ka jingialong lok ha ka jingai tika), ka ri ka la pynpaw shuh shuh ïa ka jingaiti jong ka ban ïatreilang bad kiwei pat ki ri ha ka pyrthei, da kaba ai kumba 300 million tylli ki vaccine sha palat 100 tylli ki ri.

U Shailesh Kumar Singh, uba la long mynshwa u Secretary jong ka Ministry of Rural Development, Sorkar India, u la ong ba ka seinjam Lakhpati Didi (ka dkhot jong ka seng treimon sngewbha kaba lah ban kamai shi lak ha ka shi snem) ka dei ka nuksa kumno ban pynkylla ia ka jingthmu sha ka kam kaba la pyntreikam ha ka kyrdan kaba khraw.

U Myntri Rangbahduh ka Ri u la ithuh ïa ki kynthei ha ki nongkyndong kum ki nongïalam ïa ki kam khaii pateng, ki nongpynmih mar bad ki nongai jingshakri, da kaba buh ïa ka thong kaba shai bad kaba heh na ka bynta kane ka sienjam.

Kane ka seinjam kam dei tang shaphang ka jingpynmih ïa ka jingïoh kham bun, hynrei ka long shaphang ka jingpynroi ïa ka jinglaitluid ha ka ïoh ka kot, ka burom bad ka jingithuh ïa ki kynthei hapoh ki longïing bad ha ka imlang sahlang. Kane, ha ka jingsngew jong nga, ka dei ka thong kaba kham heh jong kane ka sienjam.

U Dr. S. Somanath, uba la long mynshwa u Chairman jong ka ISRO bad Secretary jong ka tnad Department of Space, Sorkar India, u la pynpaw kumno ka jingpyllait ïa ki kyndon FDI ka la plie ïa ki lad thymmai na ka bynta ka jingïashim bynta jong ki kompani shimet, kaba la pynlong ïa ka kam sahit bneng ban long ka bynta kaba kongsan ha ka ïoh ka kot jong ka ri.’

U la ban jur ba ka ISRO ka don ka bynta kaba kongsan ban pynsuk ïa kane ka jingkylla da kaba pynïasam ïa ka jingstad, ki jingtei bad ki jaka treikam jong ka bad ki nongïashim bynta shimet. Ha ki snem ban wan, ka Space Vision 2047 jong ka India kan nang pynkhlain shuh shuh ïa ki sap jong ka ri ha ka liang ka saïan bad pynkhlain ïa ka kyrdan jong ka India kum kawei na ki ri kiba khlaiñ ha ka kam sahit bneng ha ka pyrthei.

Hadien kane ka jingïalang, ki nongïashim bynta ki la shim bynta ha ka Case Clinic, ha kaba man la ka kynhun ka la bishar bniah ïa kawei ka rai kaba kyrpang na ka bynta ka jingjia ba la bynta sha ki.

Man la ka kynhun ka la kynthup ïa ki ophisar Sorkar, ki nongïatreilang na ka imlang sahlang bad ki khynnah pule, bad la ïalam ïa ki da u nongthoh case uba la shah ai jinghikai lyngba ka seinjam Amrit Gyaan Kosh jong ka Capacity Building Commission.

Ki jingïatai jong ki kynhun, ryngkat bad ki jingïathuh kiba nyngkong eh ba la ïasam da ki nongkren, yn pynkylla sha ki jingwad bniah da ka Capacity Building Commission bad yn pynbiang ïa ki ha ka rynsan iGOT Karmayogi na ka bynta ban pyndonkam da ki ophisar Sorkar, ki jaka ai jinghikai bad ki skulbah.

Hadien kane ha katei ka sngi, yn pynlong ïa ka jingïatai panel halor ka phang “Leadership for Viksit Bharat”, bad ki ophisar Sorkar kin shim bynta ha ka Application Clinic. U Dr. T.V. Somanathan, Cabinet Secretary, un plie ïa ka Karmayogi Sankalpa bad ai ïa ka jingkren pynkut jong ka prokram.

What Next?

Recent Articles

Leave a Reply

Submit Comment

*