Shillong Naiwieng, 17: Ha ka sngi ba ar, ka kynhun jong ka Border Guard Bangladesh (BGB) kala ioh kem ia uwei u dkhot ba don ki tiar ialeh bad u ba dei jong ka Border Security Force (BSF) na India hadien ba u la leit iaid tam sha ka khappud Bangladesh ha Gowainghat kaba hap ha Sylhet.
Katkum ka jingiathuh jong ki heh nongtrei ka BGB, katei ka jingjia kala jia ha ka por 12:30 baje mynmiet ha ka khappud jong ka Bichanakandi bad dei ha ka por ba une u shipai BSF u la iaid wir jan 200 yard hapoh Bangladesh katba u la rah bad ka tiar ialeh.
Katba ka kynhun ba iaid patrol jong ka Bichanakandi Border Outpost (BOP) kaba hap hapoh ka Sylhet Battalion (48 BGB) kala iohi ia utei u briew ba rah tiar ialeh ha ka por ba don ka jingiaid patrolling jong ki bad mar mar kila bat ia u.
Hadien ba la pyn thikna ia katei ka jingjia, u Lieutenant Colonel Nur Uddin Ahmad, Commanding Officer ka Sylhet Battalion (48 BGB), u la ong ba ia utei u dkhot jong ka BSF ba la shah kem bad ka tiar ialeh jong u, la ioh kurup ha ka camp ha Bichanakandi BOP.
Haba la kylli jingkylli ia u, une u shipai BSF u la kam ba u la kum rung bakla hapoh ka khappud Bangladesh.
La don ka jing saphriang ki katto katne ki dur khih ne video ha ka rynsan social media kaba la pyni ba ia utei u shipai BSF ba shah kem ba u la kren ha ka walkie-talkie bad kyrpad iaka kynhun jong u ban iarap ban pyllait ia u katba kloi.
Ha ka video, la iohi ba ki shipai BGB kila knieh noh ia katei ka kor kren na ka kti jong u bad la shim noh iaka suloi INSAS. Hadien katei, ia une u shipai BSF la dep phah noh sha BGB outpost, ha kaba la iohi ba u la shong da ka kali ar shaka kaba dei jong u nongshong shnong katei ka thain.
Ka BGB ka la kyrpad iaka jingkyrshan kaba kyrpang bad ka BSF ban iakren halor kane ka mat. Ki ophisar kila ong ba u briew ba la kem yn sa aiti biang ha ki ophisar ka ri India lyngba kane ka jingkyrshan ha ka jingdon ki ophisar kiba hakhlieh na baroh ar ki liang pahara pud.
Katba ym pat ithuh ia ka kyrteng bad ka kyrdan jong une u dkhot jong ka BSF bad ki ophisar jong ka BGB kila ong ba dang iaid ka jingtohkit shakhmat na ka bynta ban tip shaphang jong une u shipai BSF.
Ki bor ba dei peit kila batai ba ka jinglong jingman kala don hapoh ka jingpeit bha bad ia kiwei pat ki kam ba donkam la pyniaid katkum ki kyndon ba la buh na ka bynta ki khappud.



