Tura, Jymmang 22: U Myntri Rangbah ka Jylla Conrad K Sangma mynta ka sngi ula buh ia u maw nongrim ban tei ia ka iing thymmai jong ka PASF-Abong Noga College bad plier uh ia ka Conference Hall ba dang shu tei thymmai jong ka College, hapoh ka phyllaw jong ka College ha New Tura.
Ha kane ka prokram la wan iashimbynta da ka Symbud Kongsan Soradini K Sangma, President, P.A.Sangma Foundation, Agatha K Sangma, M.P barim (Lok Sabha) bad Nongaibuit, PASF-Adong Noga College.
Dr. Nagesh Telake, President, Navdrushti (NGO), Santosh Jagdhane, Head-CSR, DORF Ketal Chemical India Ltd, Vijay Nair, Ira Gurukul Educational Trust, nalor ki bor pyniaid ka College, ki Nonghikai, ki samla pule bad ki nongialam shnong ka thain.
Kane ka iing thymmai ka College ka dei kaba la bei tyngka da ka DORF Ketal Chemicals India Ltd, hapoh ka CSR, kaba la dep ban pynlait ia ka instalment ba nyngkong kaba long T. 5 klur.
Ia kane ka project la pyntreikam hadien ka jingiasoi ia ka Memorandum of Understanding ha ka 26 tarik Naiwieng, 2025 hapdeng ka P.A Sangma Foundation, Dorf Ketal Chemicals Ltd, and ka Ira Gurukul Educational Trust.
Haba ai jingkren ha ka jingialang, u Myntri Rangbah ula batai ia kane ka sngi kum “kaba por kaba kongsan bad kaba donbok” haba pynkynmaw ba ka jingphohsniew ban seng ia ka skul Higher Secondary bad College ka dei kaba la pyrkhat nyngkong eh da u (L) Purno Agitok Sangma.
“Ka pule puthi ka dei kaba kongsan eh na ka bynta u (L) PA Sangma” ong u Myntri Rangbah bad bynrap “Ula sdang ia ka kam kum u nonghikai, bad ha shilynter ka jingim, ka mynsiem ban hikai kala neh sah bad paw ha ka rukom pyniaid ialade ha man ki kam ba u leh- la ka long kum u nongthoh khubor, u nongsaid ain, u dkhot ka Parliament, u Myntri Rangbah ka Jylla, u Lamphang ka Kok Sabha lane u President ka National People’s Party”.
U pynpaw ba une u nongialam bala khlad noh, u don beit ia ka jingngeit ha kaban btin lynti ia ki samla bad bsut ia ki jinglong kiba bha, ka akor ka burom bad ka jingtiplem para briew ha ka imlang sahlang.
“Ka pule puthi bad ka kam hikai ka dei shisha shibynta jong ka snam jong u naduh kaba sdang ka jingiaid lynti jong u bad kala iai neh sah ha baroh shi jingim” ula bynrap.
U Myntri Rangbah ula pynpaw ba wat hapdeng ki jingeh kum ka jingduna jingdon jingem bad jingkyrshan ha ka por ba sdang jong kane ka jaka pule, ka jingthrang jong ka College ka iai long kaba khlain bad ka bym lah pynkhih.
“Mynta, ha kane ka sngi ba kyrpang, ngi ai nam ia kane ka college bad ia ka building thymmai sha ka jingkynmaw burom bad ka jingthrang jong u (L) PA Sangma” ula ong.
U Myntri Rangbah ula pynpaw ruh ia ka jingsngewnguh ia u Subodh Menon, Chairman Rudin Menon bad ka longiing jong ka Dorf Ketal namar ka jingkyrshan ia kane ka jaka pule lyngba ka prokram Corporate Social Responsibility (CSR).
“Ka kompani ka lah ban jied ia kino kino ki jaka pule lane ka Jylla ha ka ri ban kynshew ia ka CSR, hynrei kila jied ia ka PASF-Abong Noga College” ula kynthoh. “Ka synniang jong ki kam dei satia tang ka sak- kila synniang haduh T. 8 klur sha ka jingtei ia ka building thymmai jong ka college lyngba ka prokram CSR”.
U Myntri Rangbah ula pyntip ba jan 13 percent na ka mang tyngka jong ka Jylla la pynlut ha ka pule puthi marwei bad pynpaw ba katba ka Meghalaya ka don ia network kaba heh duh ha ka pule puthi hapoh ka thain Shatei Lam Mhngi, ka jingpynjanai ia ka pule pule ka dang long ka jingeh kaba khraw. “Ka jingeh hakhmat jong ngi kam dei shuh halor ka jingdon hynrei ka jingbha” ula ong.
Ula ban jur ba ki jingtei marwei kim lah ban pyni ia ka jingjop bad ban jur ia ka jingdonkam ban pynleit jingmut ha ki jingmih na ka pule dangle.
“Ka jingtei ia ka building ka college kam long kaba jop satang lada ka pynkylla ia ka rukom ai jinghikai kaba bha bad saindur ia ka lawei ki samla pule. Kane ka dei ban iai long ka thong ba hakhmat eh” ula ong.
Ka PASF-Abong Noga College kala sdang ia ka kam pule puthi jong ka ha ka samoi pule 2022 kum ka degree college ha New Tura hapoh ka jingpyniaid ka PA Sangma Foundation.
Ka College kala ioh ia ka jingpyniasoh na ka North Eastern Hill University naduh ka samoi pule 2023 bad la ithuh kum ka People’s College hapoh ka Grant-in-Aid scheme jong ka Sorkar Meghalaya ha ka 12 tarik Nohprah 2022.
Ka College kala ioh ia ka kyrteng na ki arngut ki riewpawkhmat jong ka Jaidbynriew A’chik- (L) Purno Agitok Sangma bad u Abong Noga, ia uba la mane ha ka histori jong ki A•chik na ka bynta ka jingïalam ïa ka jingshong shnong kaba nyngkong eh ha ki lum Garo.
