Tura, Jymmang 22: Ka All Garo Hills Anganwadi Workers’ bad Helpers’ Federation (AGHAWHF) ka la pynlong ia ka jingialang ba kyrkieh ha DC Park, Tura, ha ka 21 tarik Jymmang 2026, ha kaba la don lang ki nongmihkhmat jong ka Anganwadi Workers bad Helpers na ki skhim bapher bapher jong ka ICDS ha kylleng kane ka ri lum Garo na ka bynta ban peit halor ka mat kaba iadei bad ka jingiakhih ba bteng, ka jingpyn slem ban ai tulop bad kiwei kiwei ki mat kiba ktah ia ka bha ka miat jong ki nongtrei Anganwadi.
Hadien ba la pyrkhat bad bishar bniah bha ia ka jingpyntip na ka Social Welfare Department, ka Federation ka la rai da kawei ka sur ban pynsangeh noh mardor ia ka jingiakhih kaba dang iaid na ka bynta ka jingmyntoi kaba khraw jong ki nongioh jingmyntoi, khamtam ki kynthei bad ki khunlung kiba shong nongrim ha ki jingshakri ba bym sangeh na ki Anganwadi Centre.
Kumta, la bthah ia baroh ki Anganwadi Worker bad ki Helper ban sdang biang ban aiti noh ia la ki kam bad ban pynthikna ba ki jingpynurlong ia ki prokram hapoh ka Integrated Child Development Services (ICDS) Scheme kin iaid beit iaid ryntih.
Ha katei ka jingialang, ki dkhot ki la pynpaw ia ka jingsngewsih ha kaba iadei bad ka jing slem ban ioh tulop ki nongtrei Anganwadi bad ki nongiarap ha kylleng ki projek jong ka ICDS ha Garo Hills. Kane ka kynhun ka la ong ba watla dep pyllait ia ka tulop shiteng, hynrei bun ki nongtrei ki dang ap ia ka tulop ba sah ba ki dei hok ban ioh, khamtam ka bynta ba ka sorkar jylla ka siew na ka tulop sngewbha jong ki.
Katba ki don ki nongtrei jong ka Anganwadi bad ki Helper kiba hap hapoh ka Betasing, Selsella, Baghmara, Gasuapara, Gambegre, Tikrikilla, Rongram bad Chokpot ICDS Projects, bad kiwei kiwei kum shym la ioh kata ka tulop ba sah ba ki dei hok ban ioh.
Kane ka jingpyn slem siew tulop ka la wanrah ia ka jingeh ha ka liang ka pisa ka tyngka ia kine ki nongtrei, kiba bun ki shaniah beit tang na kane ka dor siew ban pynbiang ka bam ka dih na ka bynta ka ïing ka sem.
La ong ba katei ka kynhun ka la pynpaw ka jingsngewsih halor ka jingpyn slem ban pyllait ia ka ka jingiarap pisa na ka sorkar lane ki bor pynïaid district ban pynbha bad sumar ia ki ïing bad ka tulop ba sah ha kiba bun ki ICDS Projects ha Garo Hills.
Katkum ka jingioh jingtip, ki longiing kiba shem jingeh ki kynthup ia ka Betasing (13 Centres), Gasuapara (4 Centres), Resubelpara (15 Centres), Selsella (6 Centres), Rongjeng (4 Centres), Songsak (6 Centres), bad Kharkutta (8 Centres), kiba khlem pat ioh ia ka tulop ba siew da ka sorkar jylla bad ka pisa siew kyrpang.
Ka Federation ka la lap ba ka jingdkai ban pyllait ia kine ki pisa ka la ktah jur ia ka jingpynbha bad ka jingpeit ia ki jaka sah ki Anganwadi bad ka la pynlong ia ka jingeh pisa ba khraw ia ki nongtrei Anganwadi bad ki nongiarap kiba dang nangeit ban pyndep ia la ki kam bad ka jinglen lade, khlem da kheiñ ia ka jingbym siew ia la ka hok ba dei ban ioh.
Ka ïing dorbar ka la kyrpad lang ia ka Sorkar Meghalaya bad ka tnat ka bha ka miat ban shim ia ki lad jingpynbeit kiba mar mar, ban pynthikna ia ka jingpyllait kloi ia baroh ki Building Maintenance Grants kiba dang sah, ka State Share honorarium, bad kiwei ki pisa kiba dangsah, khnang ba ka jingsam ia ki jingshakri bad ka jingpeit ia ki pynshongrim kin ym shah ktah sniew.
Haba shim ia ka rai ban weng noh ia ka jingiakhih da ka mynsiem kaba khuid, ka kynhun ka la mynjur lang ban kyntu jur ia ka sorkar Meghalaya bad ia ka tnad Social Welfare Department ban shim ia ki lad ki lynti kiba kloi bad kiba treikam na ka bynta ban pynlait noh ia baroh ki pisa ba dang sah kiba dei ka bynta ka sorkar jylla bad kiwei ki jingsiew ba shonghok.
Ka kynhun ka la kyrpad ruh na ka tnat ban leh ia ka jingwad bniah kaba donkam ban pynthikna ba baroh ki Anganwadi Worker bad Helper kiba ioh hok kin ioh la ka jong ka bynta khlem da pynslem shuh.
Ka kynhun ka la pynpaw biang ba ki Anganwadi Workers bad Helpers ki dei ki ‘shylluit’ ne nongkyrshan kiba kongsan eh ha ka jingsam jingshakri ha ki dong bad ki shnong hapoh ka ICDS Scheme, bad ki dang shakri ia ki paidbah da ka mynsiem ba aiti lut baroh shispah wat hapdeng ki jingeh kiba bun.
Ki dkhot ki la ban jur ba ka jingpynslem ia ka tulop bad kiwei kiwei ki bhah kam dei ka tang kata ka jingeh hynrei kidei kiba kongsan eh ban kyntiew bad pynneh ia ka ioh ka kot, ka burom, bad ka jingkyntiew mynsiem ia ki nongtrei ba hakhmat, kiba don ka bynta kaba kordor ha kaba pynheh pynsan, sumar, bad kyntiew ia ka lawei ka imlang sahlang, ka koit ka khiah ki kmie bad ki khun, ka bam ka dih, bad ka jingroi ka par.
Kane ka kynhun ka la kyntu jur ruh ia ki bor pyniaid ban pynthikna ba ym don ka jingleh bymman na ka liang ka sorkar, ki jingshah pynshitom, ne ka jingshah niew-shilliang ba la theh halor kino kino ki nongtrei ne ki nongiarap kiba la shim bynta ha ka jingiakhih kaba khlem sniew bad kaba sngur, kaba la sdang kyrpang na ka bynta ban da bad iada ia la ki hok bad ka jingbha jingmiat kiba dei hok.
Ka All Garo Hills Anganwadi Workers’ bad Helpers’ Federation ka pynpaw biang ka jingkut jingmut jong ka ban ia treilang bad ka Sorkar da ka mon kaba sngewrit bad ka jingkyrshan ban pynkhlain shuh shuh ia ki jingshakri ka ICDS (Integrated Child Development Services) ha baroh ka thain Garo Hills, ha kajuh ka por ban sumar bad kyrshan ia ka hok, ka burom, bad ki jingdonkam jong ki Anganwadi Workers bad Helpers.
Katei ka kynhun ka kyrmen ba ki mat jingeh kiba la mih ha ka por ka jingiakhih kin sa ioh ka jingpyrkhat kaba janai na ka sorkar bad ba baroh ki pisa kiba dang sah ha ka por ba la dei ban siew kin sa pyllait noh khlem pynslem, na ka bynta ka jingmyntoi jong ki nongtrei lem bad ki nongioh jingmyntoi kiba ki shakri.
