New Delhi, Naitung 15: Bun ki jingduwai bad ki jingrwai ba la aiti sha u Shree Jagannatha ki la don hangta ha ka jingkynmaw jong nga naduh dang rit. Nga sngew kmen haba nga rwai ia ki jingrwai bhajan jong u Mahaprabhu Jagannatha ha ka por ba nga dang pule ha skul bad kolej. Nga sngew jan bha bad u Mahaprabhu. Ngam ju rwai shuh ia ki bhajan ha kine ki sngi. Hynrei nga kynmaw ia u Mahaprabhu bad nga kynud ia ki bhajan jong u man la ka sngi.
Nga ju sngew ia ka jingdon jong u Mahaprabhu hajan jong nga. U kyrshan ia nga ha ki por kiba jynjar. Haduh kine ki sngi, nga kynud ia ka jingrwai ba la thaw da u Bhakta Kabi Madhusudan Rao kaba ong kumne: ‘U Mahaprabhu u don ryngkat bad nga bad sngi bad miet; da kane ka jingkynmaw, ngan iai mane ia U da ka dohnud baroh’.
Shuwa ba nga la poi ha ka rta kaba nga lah ban sngewthuh katto katne ia kiei kiei shaphang ka pyrthei, nga la sngewthuh ia ka jingkhraw jong u Mahaprabhu Jagannatha. Ha iing, la ju don ki jingiakren shaphang u Mahaprabhu Jagannatha. Kum kine ki jingiakren bunsien ki ju jia ha shnong jong ngi ruh. Ha ka por ba nga pule ha ka skul shnong, nga la ju pule man ka por ia ka jingduwai ‘Ahe Nila Shaila’ ba la thoh da u Bhakta Salbeg.
U nonghikai jong ngi u ju iathuh shibun shaphang u Mahaprabhu Jagannatha: Don kawei ka temple kaba heh ha Puri, bad ym don kawei pat ka temple kaba itynnad kum kata! Ha katei ka temple, la mane ia u Mahaprabhu Shree Jagannatha ryngkat bad ka para jong u ka Subhadra bad u para jong u u Balabhadra. U Mahaprabhu Jagannatha u long uba dum sniehdoh bad u don ki khmat kiba pyllun. Ka sniehdoh jong ka Subhadra ka long kaba stem bad jong u Balabhadra pat ka long kaba lieh kum u syntiew ba phyrnai na ka jingtyngshain jong u bnai.
Shisien ba phi la iohi ia ki blei, phim lah ban klet ia ki. U nonghikai jong ngi ruh u ju ong, u Jagannatha u long u ‘Mahaprabhu’, ka prasad jong u ka long ‘Mahaprasada’, ka temple jong u ka dei ka ‘Bada Deula’ ne ka Temple bah, ka lynti jong u ka dei ka ‘Bada Danda’, kata ka lynti bah, bad ka duriaw jong u ka dei ka ‘Mahodadhi’ ne ka Duriaw Bah. Ka Purushottam Kshetra, Puri ka jngai na ka shnong trai jong nga, ka Uparbeda ha ka elaka Mayurbhanj.
Kumno ngan ioh lad ban leit jngoh ia ka Puri? Katba nga nang san, nga la leit sha Bhubaneswar bad nga la pynrung kyrteng ialade kum ka khynnah skul ha ka Unit-2 Girls High School. Nga la sdang ban sah ha ka hostel hangta. Nangta nga la ioh lad ban leit jngoh ia ka Puri, ka Bhubaneswar, bad ka Konark. Ka jingai ia ka darshan ba nyngkong jong nga ia u Mahaprabhu Jagannatha ka dang sah ha ka jingkynmaw jong nga. Katno ka long ka temple kaba phylla, kum kine ki blei kiba khraw! Hato lah ban klet ia kine?
Hato don mano mano ba lah ban klet ia ka Ratha Yatra jong u Mahaprabhu Jagannatha? La ong ba ki 13 tylli ki tamasa ki ju rakhe ha ki khatar bnai jong ka shisnem ha Shree-Kshetra. Hynrei ka jingitynnad jong ka Ratha Yatra ka long kaba kyrpang. Ki nongmane ki iawan lang ha ka temple baroh shi snem ban ioh ia ka darshan jong u Mahaprabhu.
Hynrei shisien shisnem, u Mahaprabhu hi u mih na ka temple bad u leit sha ka temple Gundicha kaba don lyngba ka lynti Vishal, da kaba ai darshan ia ki nongmane jong U. Ha ki lai tylli ki kali ba itynnad, ki lai tylli ki Blei, ryngkat bad ka Chakraraja Sudarshana, ki leit jngoh ia ka temple Gundicha. Ki sah hangta hynniew sngi bad ki sa wan phai pat. Kane ka jinglehniam kaba khraw jong u Mahaprabhu ka long kaba ym lah ban ianujor.
Naduh ba nga dang khynnah, nga la long kaba bud ia u Mahaprabhu Jagannatha. U la ju long u Blei uba nga burom tam. U synshar ia ki jingkiew bad ki jinghiar jong ka jingim jong nga. U long ka tyllong jong ki jingkmen bad ki jingsngewsih jong nga. Nga la shah shibun ki jingeh ha ka jingim jong nga. Bad u Mahaprabhu u la ju pyllait ia nga na kita ki jingeh baroh. Nga long shisha ka khun jong U.
Haba la pynbna ia ka jingiakhun jong nga na ka bynta ka kam President ka ri India, nga la kynmaw burom ia ka kyrteng u Mahaprabhu. Nga la duwai ha u Mahaprabhu, ‘Phi ialam ia nga sha ki kyrdan kiba kum kine. Nga kyrpad ia Me ban ialam ia nga ha man la ka sienjam bad ban don ryngkat bad nga man ka por.’ U la sngap ia ka jingduwai jong nga. U ju jubab ia ki jingduwai jong nga.
Ka Ratha Yatra ka la dei ban rakhe haba nga la dei ban sah ha Delhi kum ka kyrtong ban ioh ia ka kam President. Kumta, kam long kaba lah ia nga ban leit sha Puri. Dangstep, ha ka sngi Ratha Yatra, nga la leit sha ka Temple Shree Jagannatha ha Hauz Khas, Delhi, bad nga la ioh darshan na u Mahaprabhu. Ka dohnud jong nga ka la dap da ka jingkmen. U la ai ia ki jingkyrkhu jong U ia nga. Da kaba dap da ka jingshaniah, nga la ai ia ka kot kyrtong jong nga.
Nga la iashim bynta ha ka jingialap elekshon da ka jingsngewtynnat kaba khraw. Nga dang duwai ha u Mahaprabhu Jagannath, ha ka lynti jong nga sha Central Hall jong ka Parliament na ka bynta ban bam smai kum ka President ha ka 25 tarik u Naitung 2022. Da ka jingkyrkhu jong U, ka kam ka la iaid ryntih. Ha ka por ba nga ai jingkren nyngkong kum ka President, ka la long kumba U don hangta ryngkat bad nga.
Hynrei ka dohnud jong nga ka thrang ban leit sha Puri ban ioh darshan na u Mahaprabhu. Ki sngi ki la iaid, hynrei ngam lah ban leit sha Puri. Ka la wan ha ka jingmut jong nga; kumno uno uno un ioh ia ka darshan jong U lymda U ai ia ka! Nga la duwai jar jar ha U, ‘Lada nga la leh bakla, map ia nga, Mahaprabhu! Hynrei sngewbha khot ia nga sha Puri, ai ia nga ia ka jingkyrkhu jong Me.’ U long u Mahaprabhu jong ka ‘Bhaav’ ne ki jingsngew.
Kumno Um lah ban sngewthuh ia ki jingsngew jong nga? Kham hadien, la buh por ban leit jngoh ia ka Puri. Ka tarik ka long ha ka 10 tarik u Naiwieng, 2022. Hadien ba la poi ha Puri, ngi la iaid shakhmat sha ka Shree Mandir. Katba ngi dang poi ha ka Bada Danda jong ka Puri, ka jingsngew ba phylla ka la dap ha nga. Ka Bada Danda ka dei ka jong u Shri Jagannatha. Hato don kano kano ka kam kaba nga hap ban pyndep hangne? Ka Puri ka pawnam kum ka Kshetra-Raj, kaba kongsan tam na ki jaka leit pilkrim baroh.
U Mahaprabhu u long U Blei jong ki Blei. Khlem da pyrkhat shuh, nga la phah ban pynsangeh ia ka kali jong nga. Ynda ka kali jong nga ka la sangeh, baroh ki kali kiba bud ia ka kali jong nga ruh ki la sangeh. Shwa ba uno uno un sngewthuh ia kaei kaba jia, nga la sdang ban iaid khlem da phong juti sha ka Bada Danda. Ka Shree Mandir ka jngai kumba ar kilomitar eiei. Da kaba peit beit ia ka Neel-Chakra jong ka temple bad ka Patit Paawan Dhwaj kaba kyntang halor ka Shikhar, nga la iaid shakhmat.
Katba nga nang iaid, nga ruh nga iai khublei ia ki khynnah, ki kynthei, ki samla bad ki tymmen kiba la ialum lang ha baroh arliang ka surok. Ka jingpyrkhat jong nga ka la long ha u Mahaprabhu. Ha ka khyllipmat ba nga la poi hajan Sinh-Dwaar, ka Khyrdop jong ka temple, ngam lah ban shongthait. Ha kata ka por, nga la klet noh ia lade. Da kaba thiah ha ka khyndew jong ka Bada Danda, ka lynti kaba kyntang, nga la tyrwa ia la ka Pranam da ka jingsngewrit ha u Mahaprabhu.
Nangta nga la rung shapoh ka temple. Mar ia poi ha Garbh-Griha bad ioh darshan ia ki saw ngut ki blei, nga la dap da ka jingkmen ba kynja Blei. U Mahaprabhu u long u nongiada ia ka pyrthei. U long u nongpynim ia kito kiba la iehnoh da baroh. U don beit ban pynduna ia ki jingsngewsih jong ki briew ha ka pyrthei baroh kawei. Dei na kata ka daw ba ki khmat jong U kim ju khap.
Na ka bynta jong U, ym don jingiapher hapdeng kiba heh ne kiba rit. Ha ki khmat jong U baroh ki long kiba iaryngkat bad ka jinglong marryngkat jong baroh ka long ka nongrim jong U. Da kaba ioh jingkyrkhu na U, nga la aiti lut ialade ha ka jingshakri ia kawei pa kawei ka bynta jong ka imlang sahlang.
Haba nga peit sha u Mahaprabhu Jagannatha, uta uba don ki khmat ba pyllun, nga la kner ia la ki kti ha ka jingburom bad nga la duwai, ‘To ai ba ki jingkyrkhu jong Me kin pynneh junom ia ka mynsiem jong ka jingaiti lut jong nga ha ka jingshakri ia ki paidbah, ko Mahabahu! Pynbiang ia ka jingiada jong me ia ka ri jong ngi bad ka pyrthei baroh kawei, ko Kripanidhi.’ Da kaba ong kumne, nga shem ialade ba nga la ngam jylliew ha ka Bhakti-Bhav, la thoh da ka President ka Ri India ka Droupadi Murmu New Delhi.
