Shillong, Nailur 23: Mynta ka sngi 23/Nailur/2026 ki phra ngut ki MLA ka United Democratic Party (UDP) kila rung sha ka party Bharatiya Janata Party BJP ha nongbah Delhi ia kane la pynbna da u Kiren Rijiju u myntri Kabinet ka sorkar pdeng.
Kine ki phra ngut ki MLA ka UDP kiba la pyniasoh sha ka BJP ki long u bah Mayralborne Syiem Nongpoh konstitwensi, u bah Pius Marwein Ranikor konstitwensi, u bah Lahkmen Rymbui Amlarem konstitwensi, u bah Balajied kupar Synrem Shella Konstitwensi, u bah Matthew Beyondstar Kurbah Mawphlang konstitwensi.
U bah Synshar Kupar Roy Lyngdoh Thabah Sohiong konstitwensi, u bah Kyrmen Shylla Khliehriat konstitwensi, bad u bah Ollan Singh Suin Mawsynram konstitwensi, kine baroh phra ngut ki MLA kila pyniasoh bad ka BJP ha nongbah Delhi ha ophis treikam jong ka party BJP ha ka jing ia don lang u State President ka party BJP u Rikman G.Momin.
U Bah Lahkmen Rymbui u ba dei u myntri ba peit ia tnat pule puthi ka sorkar jylla haba kren ha ki lat pathai khubor ha nongbah Delhi u la ong ki don ki mat jingdawa kaba ki donkam ia ka jingkyrshan jong ka sorkar pdeng ha ka jingiakren kila ioh ia ka jingkular na ki nongialam dei halor kane ba ki sa rung sha ka BJP.
Ha ka jingkren u myntri sorkar pdeng u Kiren Rijiju u la ong ba kane ka jingwan rung BJP kine ki phra ngut ki MLA ka UDP ka long ka jingmyntoi ia ka ri India hi baroh kawei bad kumba ka long hapoh ka jingialam jong u myntri rangbhaduh u Narendra Modi ka sain pyrthei kala kylla bad ki kam pynroi kila paw shynna ha North East bad kumjuh ha Meghalaya.
U Sumit Batra u secretary ka BJP ha ka jingkren jong u, u la ong ba ha ka jingiakren bad u bah Lahkmen Rymbui ki mat kiba kongsan kiba kila buh ha khmat ki long ka Meghalaya Resident Safety Security Act 2016 kaba la wanrah ia ka jingpynkylla kaba dang don hapoh ka jingpeit bniah ka sorkar pdeng.
Haba iadei bad ka kam dewiong, ban pynrung ia ka ktien Khasi bad Garo ha ka khyrngit kaba phra bad ban pynkynriah ia ki briew kiba shong basah ha them metor bad ia kane la iakren bad ka tnat iada ri halor kine ki mat baroh na ka liang jong ka party kin sa leh ia kaba donkam.
