Shillong, Nailur 25: Mynta ka sngi ki nonghikai Deficit kiba don 7000 ngut ha ka jylla Meghalaya naduh Primary haduh Higher Secondary kila pynlong ia ka jingiakhih da kaba iaid paidbah kaba jai jai na ophis jong ka Meghalaya Board of School Education sha Madan Malki ban dawa na ka sorkar ba kam dei ban pynduh ia ka kam nonghikai kaba dei na ka Deficit Pattern.
Ha kane ka jingiakhih kaba jai jai ia ka jingiakhih la khot da ka Khasi Jaintia Deficit School Teachers Association bad la wan ban kyrshan lang da ka Garo Hills Deficit School Teachers Association bad kine baroh ar tylli ki kwah ba ka sorkar ka dei ban pynneh ia ka Deficit Pattern.
U Vice President ka KJDSTA u Lpdius Marshillong u la ong ba jingwan jong ki ha kane ka jaka kam dei ba ki pyrshah ia ka sorkar, hynrei ka jingwan jong ki ban ia lum lang ka long ban dawa ia ka hok ka jong ki bad kane ka jingdon jong ki kalong ban pynsngew sha kito ki bor ba dei peit ba balei phi ialehkai bad ka lawei jong ka jylla.
Kum ki nonghikai ki dawa ban pynneh ia ka Deficit bad ki pyrshah ia kito kiba pyrshang ban pynduh ia ka Deficit ha kane ka jylla, kum ki nonghikai kim pyrshah ia ka jingkylla hynrei wat ktah ia ka pule puthi bad kum ki nonghikai kim kwah ban iohi ban ialehkai namar kim sngew tynnad.
Kum ki nonghikai ki sngew diaw namar ba ki shah leh beain kumta ki nonghikai ki dawa ban pynbeit noh kloi ia kine ki jingeh kaba don na ka bynta ki nonghikai, ha kane ka sngi la don ruh kiwei kiwei ki nongkren kynthup na u President u bah Bostwell Palat.
