Shillong, Naitung 24: U President ka KSU u samla Lambokstarwell Marngar u la ong ba ha kane ka jingiakynduh ia u myntri kam poh iing u Amit Shah u khlem kren ei ei bad ha dien ba kila pynsngew ia ki mat ba ki kwah ban ia kren u shu ong khublei shibun, khlem ai kano kano ka jubab.
U President ka KSU u la kynnoh ba kane ka jingbym jubab jong u myntri ka tnad kam poh iing ka dei ka jingniew beain ia ka rai jong ka iing dorbar tahwain ka jylla halor ka jingdawa ia ka Inner Line Permit, ka jylla Manipur kaba khlem dawa ka ioh hynrei ia ka jylla Meghalaya kaba la dawa pat khlem kren ei ei.
Ha kane ka jingiakynduh kaba tang kumba shphew minit ei ei, haba ia dei bad ka jingdawa ia ka ILP la kren na ka liang jong u president ka KSU bad u bah Robertjune president ka HYC, ia ka kam khappud la kren da u bah Sadon Blah na ka HNYF bad ia ka kam ktien Khasi bad Garo la kren da u Tengsan G Momin president ka GSU.
Na ka liang jong ki seng bhalang kim hun ia kane ka jingiakynduh kaba la long mynta ka sngi bad mynta kin phai sha ki nongialam kiba don ha secretariat aiu ki don ban kren halor kane ka jingdawa ILP namar kane ka jingbym jubab ei ei ka dei ka jingbym burom ia ka rai jong ka iing dorbar thaw ain ka jylla. Kane ka jingiakynduh ka shu long ba kila ioh ban pynsngew ia kaei kaba ki dawa.
U Bah Wellbirth Rani President ka FKJGP u la ong ba kane ka jingiakynduh bad u Amit Shah kala dei ka sien kaba lai, kaba nyngkong ha Delhi, kaba ar ha NECg bad kane ka dei ka sien kaba lai mynta ka sngi ha ka jingshisha u la dei ban kren ei ei hynrei u khlem jubab kum ki seng bhalang kim hun ia kane ka jingiakynduh.
U bah Lious Dohtdong u wei na ki nongialam bala don lang ha kane ka jingiakren u la ong ba kim hun namar u myntri kam poh iing ka sorkar pdeng u khlem jubab ia ka jingdawa ia ka ILP.
