Shillong, Rymphang 04: U Myntri rangbah ka jylla u Conrad K Sangma mynta ka sngi ha Jowai u la pynbna ba ia ka tamasa “Meghalayan Age Festival” yn pynlong ha Thadlaskein ha u bnai Lber taiew ba ar.
U mytnri rangbah u la ong ba ka jingthmu ban pynlong ia kane ka tamsa ha kane ka jaka ka long ban kyntiew ia ki kam jongohkai pyrthei ha kane ka jylla bad khamtam eh hapoh Jaintia Hills District.
La ong ba ha kane ka tamasa yn pyni paidbah ia ki sap ki phong bad kaei kaba jylla Meghalaya ka don. La ong ba kane kan long tang kum ka jingsdang ia ka jingpynphriang ia ki jaka jngohkai kaba ka jylla ka don ban khring ia ki briew na kylleng ka pyrthei.
Haba ia dei bad ka Iew Musiang u myntri rangbah u la ong ba ka sorkar kala dep ban phah ia ka skhim sha ka sorkar pdeng kaba dei na ka skhim NLCPR. Haba ia dei bad kane ka iew u mytnri rangbah ka jylla mynta ka sngi u la leit jngoh da la de ban tip kham bha ia kane ka iew.
Ha kane ka jingleit jong u mytnri rangbah ka jylla sha Jowai u la ia kynduh ia u CEM jong ka JHADC bad kum juh ia u MLA jong katei ka thain. Ha kane ka jingiakynduh kila ia kren ia ki kam pynroi hapoh Jaintia Hills.
U myntri rangbah u la ong ba ka jingmut jong kane ka jingpynlong ia ka Kabinet sha ki headquater jong ki District ka long ban wanrah kham jan ia ka jingtrei kam jong ka sorkar sha ki paidbah. Ha kane ka sngi ki myntri sorkar bad ki heh sorkar ruh kila ia poi sha kane ka jingialang cabinet kaba myngkong ha Jowai.
