Shillong, Iaiong 17: U National President jong ka party National People’s Party u Cornad K Sangma mynta ka sngi u la ialam ia ki 15 ngut ki MDC ha khmat jong u Lat ka jylla u Satya Pal Malik ha Raj Bhavan Shillong ban kam ba ki don ia ki number ban thaw ia ka Executive Committee kaba thymmai ha GHADC.
Ha kane ka jingleit ia kynduh ia u Lat mynta ka sngi ki long ki MDC jong ka NPP 11 ngut, GNC 1, bad 3 ngut ki MDC shimet baroh ki long 15 ngut, ha ka iing dorbar kaba 29 ngut kane ka kynhun khleh khawlang ka “Garo Hills Democratic Collation” kala don ia ka jingbun paid.
U Myntri Rangbah ka jylla u Conrad K Sangma ha dien ba la dep ban ia kynduh ia u Lat jong ka jylla u la ong ba ha ka jingialang jong ka kynhun kila jied ia u Benedic R. Marak MDC ka NPP bala jop na ka 20-Raksamgre Konstitwensi un long u kyrtong ban ia khun ia ka election CEM ha GHADC.
Ha ka jingialang la jied ia u Nikman Ch Marak MDC jong ka GNC bala jop na ka 4-Rongrikimgre Konstitwensi un long u Deputy CEM bad la jied ia u Rakesh A Sangma MDC jong ka NPP bala jop na ka 7-Babelapara Konstitwensi ban u long u kyrtong ban ia khun ia ka elekshon Chairman ha GHADC.
Ka elekshon ban jied ia u Chairman ba thymmai jong ka GHADC la buh ba kan long ha ka sngi nyngkong ban wan kata ka 19th Iaiong 2021 bad ha dien kata ynsa lah ban buh sngi ban pynlong ia ka elekshon ban jied ia u CEM ba thymmai jong ka GHADC.
Ha kane ka jingiakynduh ia u Lat ka jylla na ka liang jong u Conrad u la iathuh ba kila pynsngew sha u Lat ka jylla ia kane ka jingthaw ia kane ka kynhun kaba thymmai bad ha kine ki sngi kin sa buh ia ki mat trei kam kiba thymmai ban pyniaid ia ka GHADC.
