Shillong, Risaw 09: Ka bynta ba ar jong ka Reverse Buyer Seller Meet (RBSM 2.0), kaba la pyniaid da ka tnad Commerce and Industries, sorkar Meghalaya, la long ha State Convention Centre, Shillong, ha kaba la wanrah lang ia baroh ki nongseng kam lajong na ki 12 tylli ki distrik jong ka jylla bad ki nongthied nongpet ba na ka jylla bad nabar ri.
Ha katei ka jingiakynduh lang, ki iew rit iew ria bad ki iew ba biang lane ki Micro, Small and Medium Enterprises (MSME) na ka jylla Meghalaya kila ioh iakren bad ki nongthied nongpet bad ki nongmihkhmat na ki ri bapher bapher, da kaba ia ai jingmut lang mar kylliang halor ki mar die, ka jingbatai shaphang ki jingdonkam ki mar ki mata bad iakren shaphang ka jingiatreilang ha kane ka kam iadie ia thied.
Ki katto katne ki MSME kila lah ban iatreilang bad ki nongthied nongpet nabar ri, lem bad ka jingia soi da ka Memorandum of Understanding (MoU) na ka bynta ka jingphah iaki mar jong ki shabar ri sha ki iew jong ki.
Katei ka prokram ba ar sngi ka thmu ban pynmih iaka kam ba thymmai bad ka lad ban shalan iaki mar na ka bynta jong ki iew rit iew ria ha ka jylla da kaba pynioh iaki iaka rynsan ban pyni iaki mar jong ki, jingsngewthuh jong ki iaka jingdawa ka iew bad ban pyniasoh thikna bad ki kam khaii.
Palat 300 ngut ki nongseng kam lajong kila iashim bynta ha katei ka prokram bad 32 ngut ki nongthied nongpet ba nabar ri bad hapoh ka jylla kila don bynta lang ha katei ka jingialang.
Ka RBSM 2.0 ka khmih lynti ban pynskhem iaka jingpyn iasoh ki iew na ka bynta jong ki MSME ka Meghalaya, ha kaba kan pyniar iaka iew iaki mar ba pynmih hapoh ka jylla shabar jylla bad ban pynmih ki lad thymmai iaka jingpynsan pynheh iaki kam khaïi pateng, ka jingpynlut pisa bad ka jingshalan mar shabar.
