Shillong, Naitung 15: Iawer ka Care for India Foundation ia ki paralok ban pynkhlain ia ka jingkoit na ka jingdih buaid bad kumno ban iarap pynkhlain bad jingpynrung biang ia ki briew shimet kiba ngop ha ki jingpang dih buaid sha ka imlang sahlang ha ka jylla Meghalaya
Ha ka 14 tarik Naitung 2026, ka Care for India’s Reintegration Project, Shillong, ha ryngkat ka jingiatreilang bad ka Drug Reduction, Elimination & Action Mission (DREAM Mission) jong ka Sorkar Jylla, ka la khot ia ka jingialang jong ki paralok kaba la ai kyrteng “Ki jingshemphang shaphang ka jingdih buaid: Ka jingpynkhlain biang ia ka jingialang.”
Ka jingialang ka la wanrah lang ia ki nongmihkhmat na palat 20 tylli ki seng treimon sngewbha, ki jaka pule kiba pynshong nongrim ha ka jingngeit, ki jaka pynkhlain, bad ki tnad sorkar ban iamir jingmut kumno ban pynkhlain ia ki lynti ban ioh biang ia ka jingkoit jingkhiah bad ka jingpynrung biang ia ki briew shimet kiba ngop ha ki jingpang bampong.
Ka jingialang ka la long kum ka rynsan ban pynroi ia ka jingiakren, ban iasam ia ki jingshem ha ka kam, bad ban pynkhlain ia ka jingiatreilang hapdeng ki nongshim bynta kiba trei na ka bynta ka jingpynbha bad ka jingpyniasoh biang ia ka imlang sahlang ha Meghalaya.
Ki jingiakren ki la long halor lai tylli ki jingthmu ba kongsan, Ka Jingpynpaw ia ki Jingshisha ha ka Kyrdan: Ka Dr. Jasmine Mary Lyngdoh ka la iasam ia ki jingpeit bniah ba kordor ha ka kam bad ka la ai ia ka jingshemphang kaba jylliew jong ka ban pyni ia ki jingeh kiba lah ban leh kiba ki briew shimet ki iakynduh na ka jingpynbha pat sha ka jingim ha ka imlang sahlang.
Ka Jingithuh ia ki jingduna bad ki lad ki lynti: U Bah Francis Kharshiing, u Dr. U Cyril Tirkey, bad u Bah B.L Nari ki la ai jingmut shaphang ki jingduna kiba la don lypa ha ki rukom phah sumar, ka jingbteng jong ka jingsumar, ka jingkyrshan ha ka kamai kajih, bad ka jingpynrung biang ha ka imlang sahlang, katba ki tyrwa ia ki lad ki lynti na ka bynta ka jingiatreilang kaba khlain hapdeng ki tnad.
Pynkhlain ia ka jingiatreilang jong ki nongshim bynta ba bun: Ki nongiashim bynta ki la mynjur lang ban thaw ia ka kynhun iatreilang kaba kynthup ia ki seng treimon sngewbha, ki tnad sorkar, ki jaka pynbha ia ki briew, bad ki seng kiba pynshong nongrim ha ka jingngeit ban pynkhlain ia ka jingiatreilang bad jingkyrshan ia ki jingthmu ban pynbha pat. Ka Care For India kan shakri kum ka tnat pynïaid na ka bynta kane ka forum ha u snem ba nyngkong jong ka, ha kaba ïa ka jingïalang jong ki paralok ban wan la buh ban pynlong ha ka New Hope De-addiction Centre ha u bnai Risaw.
Haba kren ha kane ka sngi, u Bah Bob Jacob jong ka Care For India u la kynthoh, “Kane ka jingialang ka pyni ia ka jingkyrmen bad jingthmu ba ngi iasam lang—ba ka jingkoit jingkhiah kam dei ka jingkut jong ka lynti, hynrei ka jingsdang jong ka jingim kaba la ban im da ka burom, ka jingthmu, bad ka jingkyrshan jong ka imlang sahlang kaba sumar.”
Ka jingialang ka la pynkut da ka jingkular kaba thymmai na baroh ki nongshim bynta ban iatreilang ban tei ia ka mariang kaba kynthup lang, kaba iadei, bad kaba pynbha ban kyrshan ia ka jingpynbha pat kaba janai, ka jingpyniasoh biang ia ka imlang sahlang, bad ka jingpynbha ia ka jinglong jingman jong ki briew shimet kiba shah ktah ha ki jingpang pyndonkam drok ha kylleng ka Meghala.
