Shillong Naitung 22: Ka World Championships of Performing Arts (WCOPA) 2026 kala poi sha kaba kut ha ryngkat ka jingrakhe bad sam iaki khusnam ha Las Vegas, ha kaba la pyndon burom iaki samla ba iashim bynta kiba tbit.
Watla uba poi ha ka phainal marwei uba na India, u samla Kitkupar Nongsiej na ka jylla Meghalaya, um shym la ioh iaka nam Grand Champion Performer of the World, hynrei u la mih kum uwei u nongrwai ba tbit jong ka ri India, da kaba leit phai sha iing lem bad ki lai tylli ki takma ksiar, ar tylli ki medal rnong bad iohpdiang iaka First Place Scholarship.
Da kaba mihkhmat na ka ri India da ka sap rwai jong u, u Kitkupar u la pynkhring ia kiba bun ki nongbishar lyngba ki jingrwai jong u ha ki thup bapher bapher. U la ioh ar tylli ki takma ksiar bad ar tylli ki medal rnong na ka bynta ki jingrwai ba u iakop bad kiwei ki nongrwai ba iashim bynta lang na ki palat 70 tylli ki ri jong ka pyrthei.
Da kaba bynrap sa kawei ka mawjam jong ka jingjop jong u, u samla Kitkupar u la iohpdiang kawei ka medal ksiar na ka bynta ka jingpyndep jong u napdeng ki san ngut kiba wan ha ka kyrdan ba nyngkong jong ki nongrwai ba tbit ha ka jingiakop ka bakhraw jong ka Vocalist of the World Championship.
Ha kawei pat ka jingioh pdiang burom, ka rynsan WCOPA kala ai da ka khusnam First Place Scholarship ia u samla Kitkupar, da kaba pdiang bad iohi iaka sap ba tbit jong u. Kane ka scholarship ne jingai jingiarap ka long kum ka lad ban pynioh ia u ban leit hikai ialade bad pyntbit ha ka ka kam rwai kam siaw.
Ka jingleit rwai jong une u samla na Meghalaya sha ka ri nongwei kala pynlong ka jingsngew sarong na ka bynta ka ri India, khamtam na ka bynta ka longiing Don Bosco bad ki paidbah jong ka thian lam mihngi. Kane ka jingjop jong u ka pyni iaka jingkular ha lade ban nym don ka mynsiem ban kynran dien.
