Shillong, Naiwieng 20: U Chaiarman jong ka Khasi Hills Autonomous District Council u bah Pynshangianlang Syiem mynta ka sngi u la pynbna ba ka jingjied ia u Chief Executive member ba thymmai jong ka KHADC kan long la sngi thohdieng bad ka jingthep ia ki kyrteng ban ia khun ia kane ka ilekshon kan long la shai.
La pynbna hapoh ka iing dorbar ba ka jingthep kyrteng kan long shuwa ka 12 baje la shai ka sngi bad ka jingbishar bniah ia ki kot ki sla kan long ha ka por 12.15 baje shiteng sngi. Namar ba ka EC kam don shuh ka jingshong dorbar kan long ha ka 22 tarik sngi thohdieng ban jied ia u CEM ba thymmai.
