Shillong,Jylliew 12: Ka karkhana dewbilat ka Mawmluh Cherra Cement Limited kan sah satang ha ki khana pateng namar ba ka sorkar kala dep rai ban khang khyrdep noh ia kane ka karkhana dewbilat barim tam ha ka jylla ynda kala dep siew ia ka bai ia khublei kti ia ki nongtrei kaba sah mynta sa tang kumba T.30 klur.
Kane ka karkhana dewbilat naduh ki snem 1960 kala dei ka pliang ja ia ka thain Sohra hynrei ha ka jingbym poi pyrkhat ba ia kane ka karkhana dewbilat kaba la pyniaid da ka sorkar jylla la hap ban khang khyrdep noh da kaba siew noh ia ki nongtrei kiba dang sah da ka jingiakhublei kti kaba ki khot ha ka ktien nongwei ka Golden Hand Shake.
Ka sorkar jong u Conrad hadien ba kane ka karkhana kala sdang ban thut ha ka jingpynmih dewbilat naduh ki snem 2018, ka wan noh sa ka Covid -19 bad ym shym la lah shuh ban pyntreikam ia kane ka karkhana ka ban poi haduh ban khang dam syndon ia ka.
Ka sorkar jylla kala dep siew ar sien ia ki nongtrei bad kaba sah ka long satang shi sien ba kan ia khuid noh ka jingiadei hapdeng ki nongtrei bad ka sorkar jylla ha kaba iadei bad kane ka karkhana pynmih dewbilat.
Ban pynkynmaw ba kane ka karkhana dewbilat Mawmluh Cherra Cement Limited kaba la sdang ha u snem 1960 la tip ia ka kum ka Assam Cement namar ha katei ka por ka dang hap ha ka jylla Assam hadien ba la ioh ia ka jylla ba pura ha u snem 1972 la pynkylla ia ka sha ka Mawmluh Cherra Cement Limited.
