Shillong, Naiwieng 10:Ka kynhun jong ki nongthoh kot khubor na ka nongbah Shillong, kaba long kum shi bynta na ka jingiaid mihkhmat bad ki lah pathai khubor ba la pyniaid da ka Directorate of Information and Public Relations (DIPR), kila leit sha North Garo Hills distrik ha ka sngi nyngkong, kynthup iaka jaka iaid lynti ka rel ha Mendipathar, kaba dei ruh ka jaka ba don ha rel ba nyngkong ha ka jylla Meghalaya.
Ha katei ka jingleit, ka Deputy Commissioner ka North Garo Hills distrik, ka M.S.N. Marak, IAS, kala kren shaphang ka jingdonkam ba ioh na ka jingdon ka rel na ka bynta ki paidbah kane ka thain, khamtam ki nongrep, kaba la pynsuk iaki ha ka leit ka wan bad ka jingleit jong ki sha ki iew ki hat shabar kane ka thain.
Ka Marak kala ong ba ka jingioh iaka lynti rel kala pynlong iaki nongrep ba kin ioh ban phah iaki mar rep jong ki ba dang thymmai bad kiwei kiwei ki mar rep ban ioh phah sha Guwahati, ha kaba kila ioh ban die iaki mar rep jong ki bad ioh wanphai biang sha la iing ha kato kajuh hi ka sngi. Kane kala pynlong iaki ba kin lait ka shong kali kamai bad lait na ka jingai iaka bai kali katba ka pynlong ruh iaki nongrep kane ka shnong ba kin ioh ban leit sha ki iew baheh.
Kala ong ruh ba ki jhur ba bha na katei ka thain ki long kiba donkam bha ha Guwahati, kaba ai lad iaki nongrep ban khaii iaki mar jong ki. Kane ka lynti rel kala iarap ruh ban pynduna iaka dor jong ki mar ba kynthup lang iaki jingdonkam jong ka jingim da kaba pynbeit iaka jingkit mar da kaba kham suk sha katei ka distrik.
Kala ong ruh ba ka dor leit dor wan ka long kaba kham suk, ha kaba ki jaka kiba khlem don rel ki hap siew pisa kham bun iaki jingkit jingbah bad ka leit ka wan. Kane kala long ka jingiarap iaki nongrep, kaba kane ka lynti rel ha Mendipathar ka iarap ban pynkynriah stet iaki jhur bad ki mar rep sha ki iew kiba kham heh kum sha Guwahati, Kolkata bad Delhi. Nalor ba ka pynkit iaki mar rep shabar, ka dang kit ruh iaki mar ba donkam kiba pynwandur iaka jingim na ki sor bah sha kane ka thain, kaba pynlong iaki dor mar ha ka distrik ba kin kham suk.
Ka Deputy Commissioner kala ong ruh ba kane ka jingwan rah iaka lynti rel ka dang pyniar shuh shuh, kaba na kane ruh kan khmih lynti ban khring ia kiba bun ki nongbei tyngka bad pynshlur iaka jingroi ki karkhana ha North Garo Hills.
Kala pynpaw ka jingkyrmen ba ka jingpynbha iaki lynti syngkien bad ka jingtei iaki karkhana kan pynlong iaki lad ioh kam ioh jam kiba iar, kiba pynmyntoi ym iaki nongrep ha kane ka distrik hynrei kan iarap ruh iaka roi ka par baroh kawei ka jylla Meghalaya.
