Shillong, Naiwieng,10: U Lamphang jong ka iing dorbar thawain ka jylla Meghalaya, u Thomas A Sangma, u la shah khot sngewbha bad shah pynkup burom da u Lord Uday Nagaraju, uba dei u dkhot jong ka House of Lords, ha ka iing lieh jong ka England ha ka 9 tarik Naiwieng, 2026, kum shi bynta jong ka prokram ba dang bteng, ka State Legislators’ Leadership Excellence Programme.
Ha katei ka prokram, la don lang bad la kynduh u Dr. Sampath Kumar, ba dei u Additional Chief Secretary bad u Vice-Chair jong ka Meghalaya Legislative Research Fellowship Project (MLRF); u bah Cyril Diengdoh, uba dei u Commissioner bad Secretary, Parliamentary Affairs; u Malthus S. Sangma, Secretary, u MLA, u Dr. Andrew Simons, Adviser (Legislation); u bah Aiban Swer, ba dei u Director bad Project Lead, MLRF; u Stephen Anurag, NISG Project Officer bad Co-Lead, MLRF; bad u Dr. Julian Huppert, u dkhot barim jong ka iing lieh ka England bad Director jong ka Intellectual Forum, Jesus College, Cambridge.
Kane ka jingkynduh kala ai ka kabu iaka kynhun na Meghalaya ban iakynduh ia u Lord Nagaraju bad ban ioh jingtip halor ka rukom treikam ka iing lieh jong ka England, ki dustur jong u bad ka bynta jong ka House of Lords ha ki kam ain bad ka jingshngain ka ri.
Ia u Lord Uday Nagaraju, uba la tip ruh kum u Lord Nagaraju jong ka Bloomsbury, u dei ruh uwei na ki riew sain pyrthei ka British Labour Party, u nongai jingmut ka teknoloji bad u riewkhraw ha ka policy pyniaid paidbah uba dei ruh u dkhot ha ka House of Lords. Ka jingiashem ne jingiakren jong u bad ka kynhun nongmihkhmat na Meghalaya ka dei kawei na ki bynta jong ka jingiakynduh bad ha ka ri pyrthei kaba thmu ban pynkiew iaka jingshemphang halor ki kam Dorbar Pyllun bad ka jingiatreilang hapdeng ki tnat treikam.
La pynlong ia kane ka jingiakynduh hapoh ka jingpyniaid jong ka State Legislators’ Leadership Excellence Programme, kaba la pynlong ha England bad Cambridge naduh ka 7 haduh 14/Naiwieng/2026. Ia katei ka prokram, la pynlong ha ka jingiasnohkti lang da ka Meghalaya Legislative Research Fellowship Project (MLRF), sorkar Meghalaya and ka Intellectual Forum ha Jesus College, Cambridge, ha ka jingiatreilang bad ka King’s India Institute, King’s College London bad ka LSE Consulting, The London School of Economics and Political Science.
Kane ka prokram ka thmu ban pynpoi iaki nongmihkhmat bad ki ophisar ba halor ka Meghalaya sha ka jingtip bad jingiohlad kaba ha kylleng ka pyrthei halor ki rukom treikam jong ka iingdorbar thawain, ka jinglam khmat, ka synshar khadar bad ki ain paidbah, da kaba iakynduh bad iaid lang bad ki nongmihkhmat ba kynsai, ki nongthoh nongpule bad kiwei kiwei kiba bat ki jaka treikam.
Ka jingialang bad ka jingpynkup burom ha House of Lords ka pyni iaka jingleit treikam ba donkam haduh katta jong ka kynhun nongmihkhmat ha ka jingleit jngoh iaka ri England, kaba la ai lad ban ia mir jingmut halor ka synshar khadar, ka rukom synshar bad ki lad pynroi iaki tnad treikam.
