Shillong, Jylliew 13: U Myntri ka tnad Sorkar u ba long ruh u nongaiktien ka Sorkar MDA -II u bah Paul Lyngdoh u la iathuh ba ka jingdawa Inner Line Permit (ILP) ka jylla, ka Sorkar pdeng ka dang don hapdeng ka jingbishar, hynrei ka jylla shen kan wanrah ia ka jingtyrwa ban dang pynkhlaiñ ia ka Meghalaya Residents Safety and Security Act (MRSSA) kaba la pyntreikam ha ka jylla.
Haba kren sha ki ladpathai khubor u bah Paul Lyngdoh u la iathuh ba ka ha ka jingialang la iakren halor ka jingbishar bniah biang ia ka MRSSA, ban pynkhlaiñ bor shuh shuh ha kane ka aiñ khamtam hadien kaei kaba la jia ha Sohra, ban pynthikna ban tehlakam ia ki kam sniew ha ka jylla.
“Ha kaba iadei bad ka ILP, baroh ngi tip ba ka ingdorbar thaw aiñ ka Jylla ka la dep ban pdiang ia ka resolution halor ka ILP, bad ka dang sahkut hapoh ka Sorkar pdeng ban dang bishar bniah” u la ong.
U la bynrap “Ka jingbishar bniah ka long halor ba don na ki katto katne ki jingsngewkhia namar ka dei ka jingshisha ba ka jylla Meghalaya kam dei ka jylla ka ba kut hynrei ka dei ka jylla kaba pyniasoh ia kiwei pat ki jylla ha ki thaiñ Shateilammihngi, kum ka Shilshar bad ka Mizoram”
U bah Paul Lyngdoh u la ong haba peit bha ia ka MRSSA ka dei ka aiñ kaba la biang bad kaba la pyntreikam, hynrei kaba dang donkam ban kham pynkhlaiñ shuh shuh, kumta ka sorkar kan wanrah da ka jingtyrwa ban dang pynkhlaiñ shuh shuh ia ka MRSSA.
Lah ban kdew hangne ba mynta ka sngi , na ka liang ka CoMSO ki la wan tur sha Secretariat na ka bynta ban dawa pyntreikam mardor ia ka ILP ha ka jylla.
