Shillong, Risaw 28: Ki pulit jong ka Ri Bhoi District kila iathuh ba mynta ka step ha ka por 1.40 baje mynstep kila ioh ia ka jingpyntip ba ka ding kala klang kynsan ha Umsning ha ka jaka ba pynlong ia ka Trade Fair bad ha kane ka jingklang ka ding kala pynjulor lut ia baroh ki dukan kiba la wan ban ia shim bynta.
Na ka liang jong u Officer In Charge jong ka Umsning Police Outpost, haba kren ha u SP News Agency, la iathuh ba kane ka jingjia kala jia mynta ka step, ha kane ka jingjia kam shym don kano kano ka jingmynsaw ia ki briew wat la ka jingjulor kala bun bha na ka liang jong ki pulit kitohkit ia kane ka jingjia.
Haba la ioh ban ia kren bad u rangbah shnong ka shnong Umsning, u Bah Albert Shylla, u la iathuh ba ia kane ka trade fair la pynlong da ka Unity Social Organisation na Guwahati da ka jingiatreilang bad ka Seng Samla Umsning Proper A bad ki nongwan ia shim bynta kila kot sha ka 30 tylli ki dukan na kylleng.
La iathuh ba kiba wan ban ia shim bynta ha kane ka Trade Fiar ki long na Manipur, Assam, Shillong bad ki trai shnong, la iathuh ba katkum ka jingkhein ia ki tiar kitar ki mar ki mata kiba la wan rah sha kane ka trade fair ban die kala kot sha ka T.1,16,70,000/- tyngka.
Naka liang jong u rangbah shnong la ong ba ia ka daw jong ka jingpluh ym lah ban tip namar ba kane kala kem ding kynsan ha ka por miet ha ba ki briew kiba sah ha ki dukan ruh ki dang ioh thiah, don bok ba wat la ka jingduh kala bun hynrei kam shym don kano kano ka jingjia kaba sngewsih ia ki briew.
