Shillong, Jymmang 22: U Myntri Rangbah ka Jylla Meghalaya, u Conrad K Sangma mynta ka sngi u la plie paidbah ia ka prokram ai jinghikai ia ka ktien German na ka bynta ban ioh kam shabar ri ha Shillong Tech Park.
Ia kane ka prokram la kyrshan da ka Meghalaya State Skill Development Society (MSSDS) hapoh ka Department of Labour, Employment & Skill Development, da ka jingthmu ban ai jinghikai bad pynioh kam ruh ha ki jaka ai jingsumar jong ka koit ka khiah kiba tbit na kane ka jylla ha Germany.
Hadien ka jinglah jong ka jingpynpoi ia ki samla na ka Meghalaya sha Japan bad Singapore, ka Germany mynta ka la kylla long ka jaka kaba bud kaba ai ia ka rynsan ha ka pyrthei na ka bynta ki nurse bad ki nongtrei ka koit ka khiah.
U Conrad K Sangma, u la pynthikna ïa ka jingkyrshan ba pura na ka jylla, kynthup ïa ka jingïarap pisa na ka bynta ka jinghikai ba nyngkong bad ban tei ïa ka jingshaniah ia kiba ioh kam shabar ri bad u la ong, “Ki kmie ki kpa shisien ki la artatien namar ka jingsngewkhia halor ka jinglut bad ka jingshngaiñ, hynrei mynta ka sngi, ka sorkar ka ieng kum ka nongpynthikna. Ngi don hangne ban pynthikna ba ki khun jong phi kin shngain bad kin shah ialam lynti ban kin ioh ia ka kabu kaba bha tam.”
U myntri rangbah u la kular ruh ban leit synran hi dalade ia ka kynhun ba nyngkong kiba la shah jied sha Germany.
Ka Jan Eben, Country Director General of People to Help Germany, ka la pynpaw ba ka rukom treikam ba pura jong ka prokram ka la pynpaw ba kane ka jingïatreilang kam dei tang shaphang ki kam hynrei ka dei shaphang ka jingtei ïa ki jingim.
Ka Payel Bhattacharya, Business Head of IndieTalent, kala ong ki samla na ka jylla Meghalaya kila paw bad tyngshain bha ha Japan bad Singapore. Mynta ki dang pynkhreh ia lada ban long kumjuh sa ha ka ri Germany ruh kumjuh.”
