Shillong, Jymmang 06: Mynta ka sngi ka ki dkhot jong ka Central Executive Council jong ka KSU hapoh ka jingialam u general secretary u samla Donald V Thabah, samla Sonstar Nongkhlaw bad u samla Reuben A Najiar kila ia kynduh ia u Myntri Rangbah ka jylla Manipur u Biren Singh ban ia kren halor ka jingshah pyndik ki khasi kiba don ha Manipur.
Ha kane ka jingia kynduh na ka liang jong u myntri rangbah ka jylla Manipur u la ai ka jingkular ba ka sorkar kan ai ka jingiada ia ki khasi kiba sah ha katei ka jylla. Ha kane ka jingleit la synrang lang da ki dkhot ka KSU Barak Valley Circle Assam, ki dkhot ka Barak Valley Khasi Jaintia Welfare Organization, ka All Manipur Students’ Union, ka Rongmei Naga Students’ Organization Manipur.
Ha kane ka jingiakynduh la don lang ruh ki Waheh Shnong jong ki lai shnong ba shong ba sah ki Khasi ha ryngkat ka jingialam u Sinam Prakash Singh uba dei u Secretary General Ka NESO ki la ioh ban ia kynduh ia u Shri N Biren Singh uba dei u Myntri Rangbah ka Manipur. Kane ka jingiakynduh mynta ka janmiet jong ka KSU ka long halor ka jingshah thombor ki paid Khasi ha ki jaidbynriew Bengali kiba wan klun beaiñ ia ki jaka Khasi.
Ha kane ka jingiakynduh ia u myntri rangbah ka jylla Manipur hadien ba u la sngap bniah ia ka jingujor ka KSU mar mar u la phone ia u Deputy Commissioner ka Tamenglong bad hukum ba dei ban kyndang noh mardor ia kito ki poiei kharbang kiba wan shna iing beaiñ ha ki jaka Khasi.
Na ka liang jong u myntri rangbah ka jylla Manipur u la bthah ruh ban kem naphang ia kine ki poiei kiba pyndik ia ki Khasi. Shuh shuh u Biren Singh u la pyntip ba ka kam kan ym kut tang hangta hynrei un pyndonkam da ka aiñ ILP ban pynher krad syndon ia kine ki poiei na Manipur.Katkum ki kot ki sla kiba la ioh la kren shai ba ki khasi kila don ha katei ka jylla Manipur na duh ki snem 1939.
