Ampati, Naiwieng, 12: Ki pulit jong ka South West Garo Hills kila ioh kurup kumba 2000 tylli ki kuli dawai Yaba kiba khia 198.84 gram bad la kem noh ar ngut kiba donkti ha ka por ba don ka jingkhynra ha ka surok Duarapara bad Gopinathkilla ha ka 11/Naiwieng.
Hadien ba kila ioh jingtip shaphang kane, ki pulit kila suba ba don ka jingkhaii beain ia kine ki kynja jingdih pynbuaid, kumta kila ioh kem iaka kali ar shaka ba don ia u nombar ML-08J-3765 kumba 10 baje mynstep.
Ia kine ki ar ngut ba la shah kem kiba la shong da kane ka kali ar shaka, la tip kum u Saiful Miah ba khot u Sailful Islam ba la tip ruh kum u Sailful Hoque (39), khun jong uba la khlad noh, u Mazarul Hoque bad u Rakifol Miah ba la tip kum u Rakiful Islam ba la tip ruh kum u Choto Baa (29), ba dei u khun jong u Rup Miah. Kine ki dei kiba na ka shnong Dakhergaon, Kakripara Part-II, kaba hap hapoh ka Mankachar Police Station ha ka jylla Assam.
Ha ka jingkhynra kaba katkum ka ain, ki pulit kila ioh kurup kumba 2000 tylli ki dawai kuli ba suba ba dei ki Yaba na u nongshong hadien jong ka thuk thuk. Kitei ki dawai kuli ba la ioh kurup ki khia kumba 198.84 gram bad ka jingtest kaba nyngkong ka pyni ba ki don ia u Amphetamine.
Ia kitei ki mar ba suba ba dei ki mar beain bad iaka thuk thuk kaba la suba ba la pyndonkam ban kit iaki la kurup katkum ki kyndon jong ka ain. Ka jingtohkit kaba kham bniah ka dang iaid shakhmat.
Ki pulit jong ka South West Garo Hills kila ban biang iaka jingkut jingmut jong ki ban iai bteng iaki jingtrei shitom ban ialeh pyrshah iaka jingkhaii drok bad ban pynlait iaka imlang sahlang na ka jingsniew jong u drok.
