Shillong, Jymmang 20: Ki nongialam ka Hynniewtrep Border Disputes Redressal Forum (HBDRF) hynne ka sngi ki la ioh ban shnong jingialang bad u myntri rangbah duh ka jylla u Conrad K Sangma ha cabinet room ban iakren halor ka kam ia ka jia put Meghalaya bad Assam.
Ha kane ka jingialang la ba la ialam da u myntri rangbah u Conrad K Sangma la ia donglang ruh u Cyril V Diengdoh, FR Kharkongor ha kaba na ka Hynniewtrep Border Disputes Redressal Forum (HBDRF) la wan mihkhmat da u Chandame Sungoh kum u Chairman ka HBDRF, u bah Thomas Passah, u bah Erwin Sutnga bad u bah MM Thaiang.
Haba iakren bad ki nongthoh khubor hadien ba la wai ka jingialang ki nongialam ka Hynniewtrep Border Disputes Redressal Forum (HBDRF) ki la iathuh ba ki la aiti ia ki sakhi satar kumjuh ruh ka map sha u myntri rangbah, ba lehse kine kin lah ban iarap ban pynsuk ia ka sorkar jylla ban iakren bad ka sorkar Assam ba ka sorkar Assam kan pynphai biang ia ki bynta ba dei jong ka Meghalaya.
U bah Thomas Passah u la pynpaw ruh ba ki la ioh ruh ban pynpaw halor ka jingkynduh jingeh ki para khasi kiba sah ha block-1 haba iadei ka Humans Right Commission, ba ki nongshong shnong kim don ia ki ST certificate, Adhaar cards bad ki PAN card.
Shuh shuh ruh ki la pynpaw ruh halor ka jingdonkam ki briew jong ngi ki ba sah hangtei ba ki donkam ia ka surok bad ki jaka ai jingsumar bad shibun kiwei kiwei ki jingdonkam ki ba dang donkam ha kitei ki thaiñ.
“Tang namar ba ki sah ha ka jaka ba long iaknih khappud ba kin duh noh ia ka hok jongki kam mut ruh ba ngin khein poh ia ki, ki don kajuh ka human rights kumba long lang ki ba don ha sor” la ong u bah Thomas Passah.
U bah Thomas Passah u la pynpaw ba ha ka jingiakynduh bad u myntri rangbah ka sorkar jylla mynta ka sngi, u la ong ba ka don ka jingkyrmen ba kan seisoh, ha kaba u myntri rangbah u la kular ban shimkhia ban iakren iakane bad u myntri rangbah ka sorkar jylla Assam.
