Shillong, Lber 16: Ia kynduh ki nongialam ka Meghalaya State Olympic Association bad u Minister Sports ka jylla ba thymmai u Bah Shakliar Warjri, myntri ba dei peit ia ki kam ialehkai jong ka sorkar jylla mynta ka sngi ha ophis trei kam.
Ha katei ka jingiakynduh kaba nyngkong la ia kren halor ki program kiba la treilang hapdeng ka Department of Sports and Youth Affairs, Government of Meghalaya bad ka MSOA.
Nalor kiwei kiwei ki kam la pyntip ruh ha u Minister Sports ba katkum ka Constitution jong ka MSOA u Sports Minister u long ruh u ex-officio President jong ka Meghalaya State Olympic Association.
U Bah John F Kharshiing, Working President, MSOA bad u Bah Finely L Pariat, General Secretary, ki la iawer ia u Minister Sports ban pynlait por khnang ban wan iuh kjat sha ka office MSOA ban ioh ban ia kren bniah bad ban ia kynduh lang ia baroh ki President, Secretary jong ki Association kiba don hapoh ka shatri jong ka MSOA.
U Bah S. Warjri, myntri ba dei peit ia ki kam ialehkai u la mynjur ban wan sha office MSOA ynda la kham lait por ynda la wai ka dorbar mang tyngka jong ka Meghalaya Assembly.
Ha katei ka jingialang la ia don lang ka Kong Matsiewdor War Nongbri, Vice President, MSOA bad President Meghalaya Archery Association, Bah Paia War Nongbri, Secretary, Meghalaya Archery Association, Bah Dipshon Rynthathiang, Bah P Laloo, Bah EH Passah Executive Council Member, MSOA kynthup u Mr Ian Campbell, Olympian bad kiwei kiwei.
