New Delhi, Naitung 05: U Myntri Rangbah ka Jylla, Conrad K Sangma, ula leit iakynduh ia u Myntri kam Pohiing ka Ri, Shri Amit Shah ha New Delhi mynta ka sngi. Ia u Myntri Rangbah la synran da ka kynhun ki nongialam Balang na ka Jylla.
Kane ka kynhun ka kynthup ia ki nongmihkhmat na ka Presbyterian Church of India (PCI), ka North East India Christian Council (NEICC), ka Catholic Church (Archdiocese of Shillong) bad ka Garo Baptist Convention. Ka kynthup ia u Rev. H. L. Myrsing, Moderator, PCI; Rev. S. C. Diengngan, Chairman, FCRA Sub-Committee, PCI; Rev. Dr. Meyu Changkiri, General Secretary, NEICC; Fr. Teiboklang Kharbani, Administrator, Archdiocese of Shillong; bad Shri Durasal R. Marak, Youth Director, Garo Baptist Convention, nalor kiwei kiwei.
Ha ka jingiakynduh, ka kynhun kala pyntip sha u Myntri kam Pohiing ia ki jingsngewkhia jong ka Jylla ba iadei bad ki katto katne ki kyndon jong ka Foreign Contribution (Regulation) Act (FCRA), kynthup ka jingtyrwa pynkylla (amendment) ia kane ka ain, bad ka jingktah jong ki ia ka jingtreikam ki Balang, ki jaka pule, ki jaka leh synei bad jaka ai jingiarap ia ka imlang sahlang ha Meghalaya.
Kine ki Institution ki pyniaid ia bun tylli ki skul, ki hospital bad ki prokram ban shakri ia ka imlang sahlang kaba la ai ka jingshakri ia ki paidbah ha kylleng ka Jylla, khamtam ha ki jaka nongkyndong.
U Myntri Rangbah ula pynpaw ia ki bynta ba kongsan bala leh da kine ki Institution ha ka imlang sahlang bad ka kam pule dangle hapoh ka Jylla, bad kyntu ia ka Sorkar Pdeng ban shimkhia ia ka jinglong jingman ba kyrpang jong ka Meghalaya haba khmih ia ki kam ba iadei bad ka FCRA.
Ula kyntu ia ka Sorkar Pdeng ba kan pyrkhat lem ha kaban pynthikna ba ki Institution ba shisha kiba trei ha ka kam shakri ia u paidbah kin iai bteng ban trei ia ki kam khlem kano kano ka jingpynthut.
