Ampati, Jymmang 15: Ka District Administration jong ka South West Garo Hills ka la maham ban shah iaid ia ki kali heh na ka jingkieng No. 15/3 ha Betasing na ka surok Garobadha-Dalu kaba bud da ki kaiphod jong ka jing julor katei ka jingkieng.
Ia kane ka hukum, la pyn mih da u District Magistrate, u Kum. Anendya Raajsshre, IAS, hapoh ka kyndon kane Section 163 jong ka Bharatiya Nagarik Suraksha Sanhita (BNSS), 2023, ha ka jingkhmih na ka bynta ka jing shngain jong ki paidbah.
Katkum ka jingiathuh jong ki heh sorkar, u Executive Engineer, PWD (Roads), Ampati Division, u la pyntip ba katei ka jingkieng ka la sdang julor ha ka 14 tarik Jymmang, kaba pynlong ia ka jingma ban ïaid ki kali bad briew.
Ki heh ba dei peit ki sheptieng ba lada bteng kane ka jingiaid ki kali heh ka lah ban ialam sha ka jing tlor jong ka surok bad jingtwa.
Mar kumta, baroh ki kali kit khia, kynthup ia ki trok kit mar khia, ki bos, tanker, ki kali kit maw bad kiwei kiwei ki kali ba kit khia palat pud, la mana ban ïaid lyngba katei ka jingkieng tad haduh ban da pyndep ban shna bad maramot.
Ka tnad ba dei peit ka la pyntip ba la don ka surok na ka bynta ban iaid kine ki kali. Katba ia ki kali heh, la hukum ban ïaid beit beit na Betasing sha Ishaguri lyngba ka surok PMGSY, bad ïaid beit beit sha Mirjumla lyngba ka surok Garobadha-Mankachar bad hadien katei, kin bteng ban iaid sha Ampati lyngba ka surok Ampati-Mankachar.
U Superintendent of Police, District Transport Officer, and Executive Engineer, PWD (Roads), u la shah bthah ban bud ia katei ka jing hukum bad phah buh da ki kynroh-set lynti bad ki dak jingthoh ha ki junction kiba kongsan.
Ki heh sorkar ki la ong ba ka jingpyn khein ia kane ka jing hukum, kan sa shim khia hapoh ka jing peit jong ka ain. Katei ka jing hukum ka la wan mar mar bad la dep ban pyntip ha kylleng kane ka distrik.
