New Delhi, Jymmang 09: Mynta ka sngi, la plie ia ka Shillong Literary Festival 2026 – New Delhi Prelude ha Bikaner House, New Delhi, ha kaba iadei bad ka thoh ka tar Khasi, ka jing synshar khadar, cinema, ka kam thoh kot khubor , bad ki mattithaw. Ia katei ka prokram, la pynbeit da ka tnad jngoh kai pyrthei, kaba hap ha ka sorkar jong ka jylla Meghalaya, ha kaba katei katei ka jing sdang plie ia kane ka prokram ba la pynlong ar sngi ka long kum ka dak ba yn sa sdang katei ka tamasa hangne ha nongbah Shillong kaba la tip kum ka Shillong Literary Festival kaba la pyn bna ban pynlong naduh ka 12 tarik – 14 Naiwieng 2026, ha Bikaner House.
Katei ka tamasa ka thmu ban pyni ia ka kolshor ba riewspah jong ka Meghalaya bad ka dustur thoh siej bad ban pyn heh ia ka matti long shwa jong ka rukom thaw jingthaw jong kane ka jylla. Kane ka tamasa ka thmu ruh ban pyn neh pyn sah ia ka kolshor kaba la neh slem ha ka kam jngoh kai pyrthei, ban pyn shlur ia ka sap jong ki nongshong shnong ka jylla bad ban buh ia ka Meghalaya ha ka thong ban pyn roi ha ka kam shna dur, ka thoh ka tar Khasi, jingput jingtem bad ka jngai buit.
Ha kane ka sngi ba sdang plie ia ka tamasa , la don ka jingiakren hapdeng u Myntri Rangbah ka jylla Meghalaya, u Conrad K. Sangma bad u nongthoh kot khubor ba kham rangbah, u Shekhar Gupta bad ha kane ka jingiakren, ki la ialap shaphang jong ka jingialam lynti, ka rukom synshar, ka jing thrang ki samla, ka kolshor bad ka jingmih ka jing ithuh ia kane ka thain lam mihngi ne Northeast.
Ha kane ka jingiakren, la don ka jingpyn kylla ban pyn leit jingmut ia ka jylla Meghalaya halor ka jing kyntiew ia ka kam-ram, ka sap, bad ka kolshor la jong ban pynmih iohkam iohjam bad ban pyn ïaid iew ia ki jingjia ba iai neh ha kalendar.
U Gupta u la iaroh ia u Conrad na ka bynta ka jing sdang ban pynlong da kane ka tamasa Shillong Literary, da kaba pyn kynmaw ba katba u lah dep leit ha bun ki tamasa ba kum kine, hynrei ha kane tamasa ka thoh ka tar, ka rukom pyn khreh, ka jinglong ka suinbneng, ka mariang sawdong bad ka jinglong jong ki nongsngap ha kane ka tamasa, ka ia pher bak ly bak.
Ha kane ka jingiakren, u Conrad u la ong ba ka jingiohi jngai shadien jong kine ki tamasa ka long ban pyn roi bun ki tamasa rynsan bapher bapher, pyn roi ia ki tamasa kum ka Cherry Blossom Festival khnang ban pyn thikna ban don kum kine ki tamasa man la u snem ban ia kaba pyn beit ia ki jingjia ba shu jia ryngkhat.
Da kaba pyn paw ka jing kmen halor ka jingiar jong ka Shillong Literary Festival, u la ong, “Ngi la sdang na iba rit. Mynta ngi la iohi ba la nang iar. Ka la kylla long ka jingjia katkum ka kalendar; bad kaba kham kongsan, la bna ia kane shabar ka Ri Khasi ruh. Bad da kaba ngi sdang ban pynlong ia kane ka tamasa sha Delhi, kane kan sa bna lut sha kiwei pat ki ri ka pyrthei.” Bynrap u Conrad, “Ngi kyrmen ba ha kine ki snem ban wan, kane ka tamasa kan sa nang iar shuh shuh, ym tang ha India hynrei ha ka pyrthei baroh kawei.”
U Myntri Rangbah u la pyn paw ruh kumjuh ia ka jingiohi jngai jong ka sorkar ha kaba iadei bad ka jing roi ka jylla Meghalaya ha ka ban kamai ja kpoh da jingdon sap jong ki ha bun rukom, kolshor jong ki nongseng kam lajong, ka jingban jur ha ka ri kynti ia ki khlaw ki btap, ka jingroi ha ka pule puthi bad ka jing pyn shong nongrim bad ka jing iar ka lad ban kamai jong kane ka jylla.
Ha ka jing kren pdiang sngewbha, u Dr. Vijay Kumar D., IAS, Commissioner & Secretary, Department of Tourism, Government of Meghalaya, u la ong ba ka Shillong Literary Festival ka la sdang kum ka rynsan ban leh sngewbha ia ki khana, ka thoh ka tar, cinema, ka put ka tem bad ka jing ithuh ia ka kolshor jong ka jylla Meghalaya bad ka thain shane kam mihngi.
Da kaba batai shaphang ka jingiohi jngai shadien jong ka jingsdang kane ka tamasa ha New Delhi, u la pyn kynmaw ba kane ka tamasa ka long ka jing trei shitom ban lam ia ka thoh ka tar bad ka jing riewspah ka kolshor ha jylla Meghalaya sha ka rynsan shabar Meghalaya.
Da kaba kren shaphang ka jingiar jong ka jing ithuh ia ka kolshor jong ka Shillong, u la bynrap ba katba kane ka nongbah ka kylla rong syntiew kulab ha ka jing sdang ka cherry blossom ha u Naiwieng, la tip ruh ia ka kum ka ktien ba paw nam, ka “Scotland of the East” ne ka ri ba ia syriem bad ka ri Scotland kaba la kylla sha ka “Kyoto of the West”, ne ka ri jong ka thain sepngi kaba la pyn donkam da u nongthoh ba la rangbah, u Vikram Seth ha ka por ba u leit ha kane ka tamasa ha u 2024.
Ha kane ka por ba plie ia kane ka tamasa, la don ka jing pyni dur ia ka dur ne ka maian kano kano ka khyndew ne ka jaka jong kane ka thain lam mihngi. Katba ki nongshna phlim ba pawnam, u Dominic Sangma bad u Pradip Kurbah, ha ka jingiakren bad ka nongthoh kot khubor bad nongioh ia ka khusnam Pulitzer Prize, ka Suparna Sharma, la kren halor ki jingiathuhkhana kiba nang kiew, ki jing iakhun bad ka lad jong ki cinema kiba ka sdang mih bad roi na kane ka jaka.
Kine ki nong kren ki la iaroh ia ka app ‘Hello Meghalaya’ kum kawei na ki app ba iarap na ka bynta jong ki nongshna phlim shimet, da kaba pynshai ba ka long kum ka rynsan OTT kaba la pyn ioh ia ka jaka kaba kyrshan ban pyn mih pisa bad pyni ia ki phlim ha ka por, ban ia kiwei ki rynsan kiba eh ban ioh pyni ia ki phlim.
Ha ka por noh phai sngi, la pyn kut da u tyngshop ka Bollywood, u Naseeruddin Shah uba la pyn hun ia ki nongpeit lyngba ka poitri The Elephant and the Tragopan, kaba la thoh da u Vikram Seth na ka kot jong u, ka Beastly Tales from Here and There. U la pyn bud ia kine ki poitri lem bad ki kot iathuh khana jong u James Thurber bad u la pule ia ki saw tylli ki khana sha ki nongkyrshan ka thoh ka tar, kiba la don lang ha kane ka tamasa.
Ki kot iathuh khana jong u Thurber kum ka “The bear who let it alone,” “The Tiger who would be king,” “The owl who was God” bad ka “The very proper gander,” ha shwa ki kot iathuh khana jong u Seth, u Shah u la kren shaphang ka mei mariang ba ka tyrwa bad ka jing lalot jong ki briew.
Ha kane ka tamasa, la don ruh ka jing pule na ka kot “Readings from Khasi and Garo Classics” kaba la thoh da ka Prof. Streamlet Dkhar ka jing pule na ka kot U Soso Tham’s Ki Sngi Barim u Hynniewtrep bad ki kot ba la thoh da ka Kong Streamlet Dkhar, Na Thwei Pyrkhat U Longshuwa.
Katba u Dr. Crystal Cornelious D. Marak u la pyni ia ka kot ba la thoh da u D. S. Nengminza, ka Seokgimin Poetryrang bad ka Ku·bak-Ma·o Sanirang, ha kane kane ka dei shaphang ka jinglong ka jaka jong ka Ri Garo bad ki khanatang jong ki blei Goera bad Salgra. Kine ki kot ki long kum ka jing rakhe ia ka jing riewspah ka nongkynti bad ka pateng jong ka ktien kane ka jylla.
Ha ka sngi ba ar jong kane ka tamasa, yn sa pyni halor ka phang jong ka thoh ka tar kane ka thain lam mihngi, ka mariang, ka bam, ka jingpyn kylla ia ki ktien bad ka jing ithuh lyngba ki jingialang kum ka Shillong on a Plate bad Once Upon a Time ha ka Literature Festival. Ha kane ka jingialang , yn sa don ki nongkren ba pawnam, kynthup ia ka Shobhaa De, Maharani Priyadarshini Raje Scindia, Sanjoy Hazarika, Namita Gokhale, Patricia Mukhim bad kiwei kiwei.
Kane ka por janmiet ka la pyn kut da ki jingput jingtem ka rwai ka siaw da ki nongrwai ba pawnam ba hap hapoh ka Chief Minister’s Meghalaya Grassroots Music Program (CM-MGMP), kaba la pyn kylla dur ia katei ka jaka sha ka jing rakhe ia ka put ka tem jong ka jylla Meghalaya, ka tara bad ka jing ithuh ia ka kolshor.
