Shillong, Jymmang 9:Ka Akashvani Shillong ka la pynlong ia ka jingiamareh marathon ha ka nongbah mynta ka sngi ban pyndon burom ia ka jingdap 90 snem ka jingshakri jong ka ha ka kam ai jingtip paidbah.
Ka marathon ka la khring ïa ka jingïashim bynta shitrhem na ki nongmareh, kynthup ïa ki samla pule na ki skul bad ki kolej bapher bapher, bad ki nongkilan met.
Ka jingthmu ha lyndet jong kane ka sienjam ka long ban kyntiew ïa ka jingkoit jingkhiah bad ka jingïashim bynta ha ka imlang sahlang katba dang rakhe ïa ka jingnoh synñiang jong ka Akashvani kaba la neh khyndai phew snem ha ka kam ai jingtip paidbah.
Ïa kane ka prokram la plie paidbah da u Bah H. Diengdoh, Cluster Head, Akashvani Shillong ha ka jingïadonlang ki heh ophisar bad ki nongtrei ka Shillong station.
Ia kane ka jingiamareh marathon la sdang ha ka por 6:00 baje mynstep na phyllaw jong ka Akashvani Shillong kaba don ha Bomfyle Road.
Haba ai jingkren ha kane ka prokram, u la pdiang sngewbha ia ki nongmareh ban rakhe ia ka jingdap 90 snem ka jingai jingtip paidbah bad u la batai lyngkot ia ki checkpoint bad kumjuh ruh ia ki kyndon.
Kane ka jingmareh kaba jngai 5 kilomitar ka la sdang lyngba ka DIPR, DTO, MPSC Building, Barik Point, Civil Hospital Point, City Hut Dhaba sha ka Little Blossom School, la ïaid lyngba ka Hotel Polo Tower, Majestic Hotel, National People’s Party Office, State Convention Centre bad la pynkut noh ha phyllaw jong ka Akashvani Shillong.
La pynkup burom ia baroh ki nongiashim bynta da kaba sam ia ki syrnot katba ki nongjop ha baroh saw tylli ki kyrdan ki la ioh ia ki takma ryngkat ki syrnot.
Ia ki jingpynbeit na ka bynta ka jingshngain, ka jingai jingiarap ha kaba iadei bad ka koit ka khiah, ki jaka ai um, bad ka jingpyniaid ia ki kali la leh ha ka jingiatreilang bad ka Ophis Deputy Commissioner, East Khasi Hills District ban pynthikna ia ka jingiaid beit iaid ryntih jong kane ka jingiamareh marathon.
Kum kine ki jingmareh marathon bad walkathon la pynlong ha baroh kawei ka rynsan jong ka Akashvani ha ka ri baroh kawei, kaba pynthikna ïa ka jingïashim bynta bad jingpynsaphriang jingtip paidbah ha ka por ba rakhe ïa ka jingdap 90 snem.
