Shillong, Jylliew 02: U Myntri Rangbah ka Jylla Conrad K.Sangma mynta ka sngi 02/ jylliew/2026 ula plie ia ka Solar Photovoltaic (PV) Plant ba 50 KW ha St. Mary’s Higher Secondary School Shillong, kaba la pyntrei lyngba ka Chief Minister’s Solar Mission, kaba pyni sa uwei pat u mawjam ba kongsan sha ka jingpyndonkam ia ka bording ka bym lut shuh ne renewable energy bad ka roi ka par kaba neh hapoh ka Jylla.
Ia ka skhim la pyntrei da ka Meghalaya New and Renewable Energy Development Agency (MNREDA) bad ka dei kawei na ki jingpyndait ia ki kor solar kaba heh duh ha ka jaka pule ha Meghalaya.
Kane ka kor ba 50KW, kaba shongdor kumba T.50 lak, ka don ia ki battery ban kyrshan bad la khmih lynti ba kan synniang shikatdei eh sha ka jinglah pyndap ia ka jingdonkam bording jong ka skul lyngba ka bording kaba khuid bad ka bym lut shuh.
Haba kren ha ka jingialang, u Myntri Rangbah Conrad K. Sangma ula pynpaw ia ka jingkongsan ka bording ka bym lut shuh haba pyndonkam ha ka jingiakhun ia ka jingkylla ka suinbneng bad pynthikna ia ka lawei kaba dap ba biang na ka bynta ka Meghalaya.
“Ka bording bym lut shuh kam dei shuh tang ka jingmut-ka dei ka jingdonkam jong ka por” ula ong haba pynpaw ba ka jingnang jur ki jingktah jong ka jingkylla ka suinbneng ia ka mariang, ka kamai kajih bad ka jingim ba man ka sngi kala pynlong ia ka Sorkar bad ka imlang sahlang ban wad katba shem ia ki tyllong ban ioh ia ka bording kaba khuid.
Haba shim ia kane ka jingplie kum ka dak jong ka jingshimkhia ka Sorkar Jylla ban pynmih ia ka bording ka bym lut shuh, u Myntri Ragbah ula ban jur ba ki sienjam jong ka roi ka par kaba jop ka donkam kham bun shah ban ia ka jingpyndonkam tang ia ki technology.
“Katba ka technology ka mih namar jong ngi ba ngin lah weng ia ki jingeh, ka technology hi dalade kam pat biang satia. Kaei kaba kham kongsan ka long la ngi lah ne em ban pynkylla ia kata ka technology sha ka lynti ban lah pynbeit” ula ong.
Haba batai ia ka jingheh jong ka Mission, ula pyntip ba palat 1.5 MW ka jingtan bording na ka sngi lah dep ban pyndait hajan 700 tylli ki skul ha kylleng ka Meghalaya hapoh ka CM Somar Mission, katba ka jingpyntrei sa ha ki 1300 tylli kin sa sdang noh shen.
U Myntri Rangbah ula pynpaw ruh halor ka jingiohnong na kane ka project bad ong ba kane ka jingpyndait ia ka solar la khmih lynti ba kan iarap ia ka skul ban ioh pynlang kumba 6,000 unit ka bording manla u bnai, kaba kot ia ka jingioh pyn lang pisa ba jan kot T.40,000 shibnai lane jan kot ia ka T.5 lak shisnem.
Kiwei pat kiba la ai jingkren ki kynthup ia u Dr. Joram Beda, Commissioner & Secretary, Power Department, Sr. Sonia Chacko, Principal of St. Mary’s Higher Secondary School, bad kiwei kiwei.
